Оҕо сааспыт доҕоро – кинигэ

Хаартыскаҕа: Татьяна Захарова-Лоһуура учуутала А.М.Григорьева-Сандаарыйаны кытта

Татьяна Захарова-Лоһуура:

– Биһигини продленкаҕа поэтесса, суруйааччы Александра Михайловна Григорьева-Сандаарыйа үөрэппитэ. Кини аптаах-алыптаах остуоруйалары кэпсиирин олус да күүтэрим. Учууталым кинигэтигэр ымсыыран, библиотекаҕа тиийэн көрдөөбүппүн субу баардыы өйдүүбүн. За тридевять земель» диэн нуучча норуотун остуоруйаларын хомуурунньуга этэ. Нэһилиэк бибилэтиэкэтигэр соҕотох кинигэ былдьаһык быһыылааҕа. Хаста да бара сылдьыбыттааҕым. Билигин санаатахха, өҥө-түүтэ өлбөөдүйбүт, бэрт эргэ кинигэ этэ. Остуоруйалары сөбүлүүр буолан, бэйэм суруйан холонон көрөр буолбутум. Сандаарыйа сирдээн, «Элгээйи кыымнара» эдэр кэрэспэдьиэннэр постарыгар киирбиппин күн бүгүҥҥэ диэри күндүтүк саныыбын.  

Өссө биир өйбөр хаалбыт кинигэм – учууталым Аким Кондратьев «Олег Горожанин» поэмата. Сүрүн дьоруой оҕону быыһаары, суорума суолланарын олус чугастык ылыммытым, аһыммытым. Манна даҕатан эттэххэ, быйыл учууталым Аким Андреевич төрөөбүтэ 95 сыла.

Арыый улаатан баран Николай Габышев «Сүүс кэпсээн» кинигэтин олус сөбүлээбитим. Кини кэпсээннэрэ, дьиҥэр, оҕоҕо аналлаах буолбатахтар эрээри, ааҕааччыны тардар күүстээхтэр. Кылгас, тэттик эрээри, киһиэхэ олус тиийимтиэ тылынан суруйар талаанын билигин да сөҕөбүн-махтайабын.

Ааҕыы абылаҥар, суруйуу эйгэтигэр, айар үлэ аартыгар сирдээбит, инники идэбин таларбар суолдьут сулус буолбут учууталларбар Александра Михайловна Григорьева-Сандаарыйаҕа, Аким Андреевич Кондратьевка махталым улахан.

Маргарита Акимова:

– Оҕо сылдьан Амма Аччыгыйа «Тоҕус төгүл тоҕо» кинигэтин олус умсугуйан аахпытым. Маҥнайгы кылааска үчүгэй үөрэхтээҕим иһин аймахтарым Амма Аччыгыйа «Киһи уонна айымньы» диэн кинигэтин бэлэхтээбиттэрэ. Улахан дьоҥҥо аналлаах күөх тастаах халыҥ кинигэ этэ. Ырытыылардаах, ахтыылардаах. Ону саҥа сүһүөхтээн ааҕа сатыы сылдьар кыра киһи, дьоммун үтүктэн, дьоһумсуйа-дьоһумсуйа аахпыта буоларбын өйдүүбүн.

Ити кэмтэн ийэлээх аҕам «Хотугу сулус» сурунаалы доргуччу аахтарар буолбуттара. Бу санаатахха, бытааннык, баҕар, чуолкайа да суохтук ааҕар киһини дьонум бэркэ болҕойон, сэҥээрэн, тулуйан-тэһийэн истэллэрэ. Ити баар эбит, оҕону кинигэҕэ сыһыарар судургу ньыма.  

Наталья Кычкина:

– Орто кылаастарга сылдьан Александр Матросов хорсун быһыытын туһунан кыһыл тастаах халыҥ кинигэни нэһилиэк бибилэтиэкэтиттэн уларсан аахпытым, олус сөбүлээбитим уонна дьоруойу аһыммытым. Өссө алын кылааска «Октябрь чаһыта уонна картата» диэн улахан, кэтит кинигэни ааҕарым, арааһа, долбуурга баппакка эбитэ дуу, наар көрдөрүүгэ турарын өйдөөн хаалбыппын.

Ийэлээх аҕам наһаа элбэх кинигэни мунньаллар этэ. Аны оччотооҕу кэм дьоно «Хотугу сулус» сурунаалы суруйтаран ааҕаллара. Онон кинигэ, хаһыат, сурунаал ортотугар улааппыппыт. Ийэм атыыласпыт кинигэтигэр хайаан да илии баттыыр идэлээҕэ. Мин билигин эмиэ саҥа кинигэ ыллахпына, «Кычкиннар библиотекалара» диэн суруйабын. Билигин дьонум муспут кинигэлэрэ бэйэтэ дьоҕус библиотека буолан, кырдьаҕас дьиэбитигэр дьоһуннаах миэстэни ылан турар.

Учуутал дьүөгэм: «Ааҕа олорон саамай интэриэһинэй түгэҥҥэ тохтоон хаалыҥ, оччоҕо оҕо бэйэтэ булан ааҕар», – диэн олус үчүгэй сүбэни биэрэн турар.  

Оттон эһиги оҕо сылдьан ханнык кинигэни сөбүлээн аахпыккытый?