Оҕо саас баҕа санаатыгар...

Медицинскэй колледж устудьуоннара олорор уопсайдарынын бастакы этээһигэр баар лабораторнай куорпуска үрүҥ халааттаах уоллаах кыыс сытар ыарыһаҕы көрүү туһунан быһааран биэрэ-биэрэ көрдөрөллөрүн мустубут дьон олус сэргээн истэллэр, көрөллөр.
Бу – медколледж маҥнайгы кууруһун устудьуоннара Анна Павлова уонна Сандал Дьячковскай.

Сандал Дьячковскай, Дьокуускай-дааҕы медицинскэй колледж бастакы кууруһун устудьуона:

– Чурапчы улууһун Мугудай нэһилиэгиттэн сылдьабын. Ыал саамай кыра оҕотобун, 18 саастаахпын. Медик – бу мин кыра эрдэхпиттэн интэриэһиргээн улааппыт уонна ону олоххо киллэрэргэ сыал туруоруммут идэм.

Оскуола эрдэхпиттэн медицинскэй хайысхалаах араас таһымнаах НПК-ларга кыттыбытым уонна куруук миэстэлэһэр этим. Бу 2025 сыллаахха улууспар Чурапчыга «Инникигэ хардыы» НПК медицина секциятыгар муҥутуур кыайыылаах буолбутум. Онтон салгыы өрөспүүбүлүкэ таһымнаах күрэххэ кыайаммын Арассыыйаҕа кыттар чиэскэ тиксибитим. Ол түмүгэр Москубаҕа Бауман аатынан университекка атын регионнар кыайыылаахтарыныын кыттан 2-с миэстэ буолбутум мин саамай чыпчаал кыайыым этэ. Үлэм «Эффективность тренажера «Хатан» на когнитивные показатели учащихся начальных классов» диэн ааттааҕа. Сылгы сиэлиттэн, кутуругуттан оҥоһуллубут «Хатан» тренажер өй үлэтэ тупсарыгар көмөлөһөр.

Бүгүн биһиги үөрэхпит кыһатыгар «ДолгоЖить» когнитивнай устуудьуйа» куурсун истээччилэрэ кэллилэр. Кинилэри сытар ыарыһаҕы кытта үлэлииргэ практическай көмөнү оҥорорго үөрэттибит. Практикаҕа маннык көрдөрүү биһиэхэ, устудьуоннарга, эмиэ олус наадалаах. Онон икки өттүттэн туһалаах көрсүһүү буолла.

Үөрэнэрбэр туох даҕаны ыарахаттары көрсүбэппин. Бэйэбэр интэриэһинэй буолан, чэпчэки.

Анна Павлова, Дьокуускай-дааҕы медколледж бастакы кууруһун устудьуона:

– Мин Сунтаар улууһун Түбэй Дьаарханыттан сылдьабын. Кыра эрдэхпиттэн медик буолуохпун баҕарарым. Сиэстэрэ – быраас уҥа илиитэ. Кини тулуурдаах, үлэтигэр болҕомтолоох, атыттарга көмөлөһөр киэҥ билиилээх, эйэҕэс майгылаах буолуохтаах.

Бүгүн биһиги Сандал Дьячковскайдыын «ДолгоЖить» истээччилэригэр сытар ыарыһаҕы көрүү-истии ньымаларын көрдөрдүбүт. Онно «Вспомогательные ремни для перемещения», «Скользящая простыня», «Флекси, диск, доска для пересаживания» курдук ыарыһаҕы көһөрөр көмө маллары тутуннубут. Бу биһиги эдэр чинчийээччилэр «Шаг в будущую профессию» Форумнарыгар  кыттыахтаах тиэмэбит. Салайааччыбыт Анна Федоровна Былкова.

Маннык Форумҥа маҥнайгы холонуум буолар. Бүгүн кыратык долгуйан ыллым. Сандал оннук түгэҥҥэ ордук бэлэмнээх эбит дии санаатым. Онон киниэхэ эрэллээхпин. Итинник улахан форумҥа кыттар миэхэ саамай үрдүк ситиһии буолар.