Оҕо лааҕырдарыгар 13 тыһыынчаттан тахса сайабылыанньа киирдэ

Бу туһунан СӨ Бырабыыталыстыбатын Бэрэссэдээтэлин солбуйааччы Анатолий Семёнов иһитиннэрдэ.

Быйыл сайын өрөспүүбүлүкэ үрдүнэн барыта 480 лааҕыр үлэлиэҕэ, онно 36 217 оҕо сынньаныаҕа.

Лааҕырдар материальнай-техническэй базаларын саҥардыыга уонна оҕолорго эбии миэстэлэри тэрийиигэ ураты болҕомто ууруллар.

Ол курдук, 2024 сылга федеральнай өйөбүлүнэн Дьокуускайга «Спутник» лааҕырга 200 миэстэлээх түөрт саҥа куорпус аһыллыбыта. 2025 сылга Мэҥэ Хаҥалас улууһун Нуораҕана сэлиэнньэтигэр «Илгэ» лааҕырга 100 миэстэлээх икки куорпус үлэҕэ киирбитэ.

Билигин Дьокуускайга «Энергетик» оҕо лааҕырыгар — «Сосновый бор» Оҕо сынньалаҥын уонна чэбдигирдии киинин эбии былаһааккатыгар саҥа эбийиэктэр тутулла тураллар. Манна түөрт саҥа куорпус тутуллар, үлэни ыам ыйын 25 күнүгэр диэри бүтэрэр былааннаахтар. Бу үлэҕэ киирдэҕинэ, лааҕыр иитиллээччилэрин ахсаана эбии 200 миэстэнэн эбиллиэҕэ.

СӨ бырабыыталыстыбатыгар иһитиннэрбиттэринэн, сайабылыанньаны биэрии кэмигэр техническэй кыһалҕалар үөскээтэхтэринэ, олохтоохтор маннык төлөпүөнүнэн билсиэхтэрин сөп: 8-4112-318-220, оттон тэрээһин боппуруостарыгар консультациялар босхо лииньийэлэрэ: 8-800-550-14-21.