Оҕо күүтэр устудьуоннар дэкириэт босуобуйатын ылыахтарын сөп

Бу туһунан РИА Сонуннара, Госдуума үлэҕэ, социальнай бэлиитикэҕэ уонна бэтэрээннэр дьыалаларыгар сис кэмитиэтин бастакы бэрэссэдээтэлэ Николай Коломейцевка сигэнэн иһитиннэрэр. Кини этэринэн, урукку өттүгэр төлөбүр истипиэндьийэҕэ тэҥнэһэр эбит буоллаҕына, 2025 сыл балаҕан ыйын 1 күнүттэн тиийинэн олоруу алын кээмэйигэр диэри үрдээбит. Үрдэтиллибит босуобуйаны үрдүк, орто анал үөрэх уонна училище устудьуоннара үөрэх төлөбүрүн көрүҥүттэн тутулуга суох (бүддьүөт эбэтэр төлөбүрдээх) ылар бырааптаахтар. Төлөбүрү «Госуслуги» портал, МФЦ эбэтэр Социальнай пуонда нөҥүө оҥотторуохха сөп. Онно гинекологтан уонна деканаттан ыспыраапка ирдэнэр.

Коломейцев маны таһынан Арассыыйа Наукаҕа уонна үрдүк үөрэххэ министиэристибэтин дааннайынан, аҥаардас үрдүк үөрэх кыһаларыгар күнүскү салааҕа 16 тыһыынчаттан тахса оҕолоох устудьуон үөрэнэр диэн бэлиэтээтэ.