Оҕо көмүскэлин күнүгэр сыһыаран, автолюлька туттарыахтара

Оҕо көмүскэлин күнүн көрсө сарсын, ыам ыйын 29 күнүгэр, Дьокуускай Перинатальнай киинигэр «Кырачааннарга куттала суох айан суола» аахсыйа чэрчитинэн оҕо күүтэр уонна бэлиэр кырачааннаах ыалларга автолюлькалары туттарыы үөрүүлээх тэрээһинэ буолар.

Бу олус туһалаах тэрили эдэр, устудьуон ыалларга уонна үп-харчы өттүнэн уустук балаһыанньаҕа сылдьар төрөппүттэргэ туттарыахтара.
«Быйыл биһиги өрөспүүбүлүкэбит «Кырачааннарга куттала суох айан суола» диэн бэртээхэй социальнай-сырдатар бырайыакка кыттар. Быйыл аныгы ирдэбилгэ эппиэттиир, анал сертификацияны ааспыт 35 автолюлька бэриллиэ. Бастакы икки автолюльканы элбэх оҕолоох дьиэ кэргэттэр ылбыттара. Оттон Оҕо көмүскэлин күнүн иннинэ итинник 29 тэрил туттарыллыаҕа. Бу автолюлька биир сылга диэри болдьоххо босхо туһаныыга, уларсыкка бэриллэр. Ону кытта кырачааннары плюш эһэ бэлэх күүтэр», – диэн, СӨ Оҕо быраабыгар боломуочуйалааҕа Туйаара Васильева кэпсээбит.

«Улахан дьиэ кэргэн» РОООМС бэрэссэдээтэлэ Альберт Васильев бу бырайыак икки суолталаах соругу толорорун этэр. Ол курдук, төрөппүттэр кырачааннарын күн сиригэр кэлбит бастакы күннэриттэн саҕалаан массыынаҕа илдьэ сылдьар кыахтаналларын, ону тэҥэ автолюлька суол саахала тахсар түгэнигэр оҕо эчэйэр кутталын аҕыйатарын бэлиэтиир. Кини партнердарга уонна өрөспүүбүлүкэ салалтатыгар – өйөбүллэрин иһин, оттон министиэристибэлэргэ итинник өйөбүлгэ наадыйар ыаллары булан көмөлөспүттэрин иһин – махтанар.
Болҕой: бэс уонна от ыйдарыгар оҕо күүтэр, автолюльканы бэйэлэрэ ылынар кыаҕа суох эдэр төрөппүттэр «Большая семья» уопсастыбаннай тэрилтэҕэ быһа тахсыахтарын сөп. Онуоха кинилэр  bolshayasemiya14@mail.ru почтаҕа тахсан көмөҕө наадыйалларын туоһулуур докумуоннары ыытыахтарын наада.

Оннук докумуоҥҥа киирсэр: устудьуон билиэтэ, ийэ төрүөхтээх болдьоҕун көрдөрөр ыспыраапка эбэтэр оҕо төрөөбүтүн туһунан сибидиэтэлистибэ биитэр тииһинэн олоруу алын кээмэйигэр хапсыбат дохуоттаахтарын туһунан ыспыраапка.  

Тэрилтэ исписэлиистэрэ киирбит докумуоннары көрөн-үөрэтэн баран, сайаапкаласпыт төрөппүттэргэ эрийэн, автолюльканы босхо уларсар туһунан дуогабары түһэрсии бэрээдэгин, усулуобуйатын,  хаһан ылыахтарын сөбүн быһааран биэриэхтэрэ.  

Чопчулаан эттэххэ, бу автолюлькалары уларсыкка биэрии – үөһэ ааттаммыт элбэх оҕолоох дьиэ кэргэттэр уопсастыбаннай тэрилтэлэрин, Оҕо быраабыгар боломуочуйалааҕын уонна ИДьМ Судаарыстыбаннай автоинспекциятын управлениетын кыттыгас бырайыактара.

Бу сонун өйөбүл «Хендэ Мотор СНГ»  диэн хампаанньа 2017 сылтан саҕалаан РФ Үөрэххэ министиэристибэтин уонна дойду ИДьМын суолга куттал суох буолуутун хааччыйар кылаабынай управлениетын өйөбүллэринэн үлэлэтэр “Куттала суох айан суола” көҕүлээһинин иһинэн олоххо киирбит. 

Бу туһунан АГиП пресс-сулууспата суруйар.