Оҕо искусствотын оскуолата 202-с түөлбэҕэ көһүөҕэ

Ленин проспегар турар 1 №-дээх Оҕо искусствотын оскуолатын атын сиргэ көһөрөр туһунан кэпсэтиилэр үөрэх кыһатын кэлэктиибин даҕаны, төрөппүттэри даҕаны долгуппута ыраатта.

Бу күннэргэ ити боппуруос Ил Дархан Айсен Николаев, Бырабыыталыстыба чилиэннэрэ уонна Дьокуускай куорат Олохтоох дьаһалтатын бэрэстэбиитэллэрэ кыттыылаах быһаарылынна. 
Ол курдук, өрөспүүбүлүкэ баһылыга Оҕо искусствотын оскуолатын сөптөөх дьиэнэн-уотунан уонна усулуобуйанан хааччыйарга сорудахтаан, 202-с түөлбэҕэ баар «Бригантинаҕа» көһөрөргө быһаарыы ылылынна.

«Бастатан туран, куорат киинигэр буолан, оҕолорго барарга-кэлэргэ табыгастаах. Иккиһинэн, үөрэх процеһын ыытарга сөптөөх өрөмүөнү оҥорор кыах баар. Олунньу 10 күнүн ааспакка ыытыллар үлэ былаанын оҥоруохха наада. Биһиги сорукпут – эдэр талааннарга сөптөөх усулуобуйаны тэрийии», – диэтэ Айсен Николаев.
Онон, олунньу 10 күнүгэр диэри бырайыак-смета докумуона чөкөтүллэн, 2025 сыл бүтүөр диэри эбийиэк бэлэм буолуохтаах. Ол туһунан Ил Дархан уонна Бырабыыталыстыба саайта суруйар.

Хаартыска: Андрей Сорокин, СИА