Оҕо босуобуйатын уорбут ийэлээх кыыһы сууттаатылар

1976 сыллааҕы төрүөх ийэ уонна 2000 сыллааҕы төрүөх кыыс социальнай босуобуйалары ылыыга массыанньыктааһыҥҥа буруйдаатылар. Ылбыт суумалара уопсайа 1,36 мөл. солк. тэҥнэспит. Ол курдук, кыраныысса таһыгар көһөн олорор кыыһыгар ийэтэ Дьокуускайга сымыйа прописка оҥотторбут.

Суут быһаарбытынан, 2021 сыллаахха ийэтэ Арассыыйа тас өттүгэр олорор, Саха сиригэр олорор да былаана суох кыыһыгар Дьокуускайга сымыйа регистрация оҥотторуохха диэбит. Ол кэннэ Социальнай харысхал уорганнарыгар уонна Социальнай пуондаҕа сайабылыанньа суруйан, араас оҕо босуобуйатын анаппыт, ол тухары кыыс олорор сирин ыйарыгар сымыйа дааннайдары биэрэр эбит.

2021 сыл бэс ыйыттан 2025 сыл тохсунньутугар диэри кини счетугар 1 361 425,95 солк., ол иһигэр  1,28 мөл. солк. федеральнай бүддьүөттэн, 79 тыһ. солк. өрөспүүбүлүкэ бүддьүөтүттэн барбыт.

Суукка буруйданааччылар иккиэн буруйдарын толору билиммиттэр. Кинилэри РФ Холуобунай кодексатын 159.2 ыст., 4 ч. (эрдэ куомуннаһан туран, төлөбүрдэри ылар сыаллаах массыанньыктааһыҥҥа) буруйдааҕынан аахпыттар

Кыыһа 2 сыллаах хаайыыга уураахтаммыт. Уопсай эрэһиимнээх холуонньаҕа оҕото 14 сааһын туолбутун кэннэ барар буолбут.

Ийэтэ 2 сыл 6 ый болдьоххо уопсай эрэһиимнээх холуонньаҕа утаарыллыбыт. Суут саалатыттан хаайыыга барбыт.

Маны тэҥэ, суут Дьокуускай социальнай харалтаҕа управлениетын уонна Саха сиринээҕи Социальнай пуонда түһэрбит гражданскай үҥсүүлэрин аһардыбыт. Уопсайа буруйу оҥорооччулартан 1 361 425,95 солк. хоромньуну толуйтарар буолбуттар.

Бириигэбэр сокуонунан күүһүгэр киирэ илик, аһарыныахтарын сөп.