Нуучча тыйаатырыгар Александр Невскэй туһунан испэктээк турда

Испэктээккэ анаан 80-тан тахса көстүүм тигиллибитин, кыргыһыы сыаналарыгар анаан хас эмэ уонунан батыйа, декорация арааһа оҥоһуллубутун туһунан тыйаатыр пресс-сулууспата иһитиннэрэр.

Бэлиэтээн эттэххэ, саҥа туруоруу олоххо киириитигэр тыйаатыр Бүтүн Арассыыйатааҕы аныгы драматурдар айымньыларынан туруорууларга күрэх кыайыылааҕынан буолбута үтүөлээх. Онон саҥа испэктээк федеральнай үбүлээһини ылбыт. Оттон испэктээги олохтоох ааптар Сергей Прачев «Солнце Земли Православной» поэтическай летопиһынан режиссер, тыйаатыр сүрүн режиссера Андрей Габышев туруорбут.

Санатар буоллахха, 2015 сыллаахха Өрт оонньууларын чэрчитинэн саха продюсера Владимир Иванов идиэйэтинэн, саха режиссера Андрей Борисов туруоруутугар, Былатыан Ойуунускай аатынан Саха тыйаатырын худуоһунньуктара Сардана Федотова, Михаил Егоров үлэлэһэннэр, Иркутскайдааҕы Н.П. Охлопков аатынан драма тыйаатырыгар «Александр Невский в Срединном мире» испэктээк оонньоммута. Маны таһынан сүрүн оруоллары эмиэ Саха тыйаатырын артыыстара Иннокентий Дакаяров, Александр Борисов, Василий Борисов толорбуттара.

Испэктээктэр киэһэ 18:00 ч. саҕаланаллар.
Хаартыска: А.С. Пушкин аатынан нуучча драмтыйаатыра, "Киин куорат" хаһыат архыыбыттан