Нуучча тылыгар уонна литэрэтиирэтигэр интэриэһи көҕүлээри

Стипендиаты үрдүк үөрэх кыһаларыгар баар учуонай сэбиэттэр куонкуруска киллэриллибит хандьыдааттартан талар буолуохтара. Күрэскэ академическай иэһэ суох, аттестация түмүгүнэн ылбыт сыаналара “үчүгэй” диэнтэн түспэтэх устудьуоннар киириэхтэрин сөп. Ону тэҥэ рецензиялаһыы ыытыллар билим таһаарыыларыгар үлэлэрэ бэчээттэммит, билим кэмпириэнсийэлэригэр кыттыбыт, норуоттар икки ардыларынааҕы уонна дойду таһымнаах наҕараадалардаах, билим-чинчийии үлэтигэр граннаах буолуулара кыайар кыаҕы улаатыннарар.

Людмила Алексеевна Вербицкая (1936-2019) – биллиилээх лингвист‑русист, филология билимин доктора, РНА академига. Санкт‑Петербург судаарыстыбаннай  университетыгар 1994-2008 сс. ректордаабыта, 2008 с. –ити үрдүк үөрэх кыһатын бэрэсидьиэнэ.

Анаммыт стипендия биир сыл устата бэриллэр. Манна бакалавриат бырагырааматыгар үөрэнээччилэр 2-с куурустан саҕалаан кыттар кыахтаахтар. Оттон магистратура бырагырааматыгар үөрэнээччилэр – бастакы куурустан.

Инньэ гынан, бу дьыл балаҕан ыйын 1  күнүттэн дойду үрдүнэн күнүскү үөрэх бастыҥ 10 устудьуона (15 тыһ. солк.) уонна 10 аспирана (20 тыһ. солк.) Вербицкая аатынан истипиэндийэ ылар буолуохтара.