Ньурба тыйаатырын артыыстарыгар барҕа махтал

"Уот Дьулустаан" сериалга Сүөкүлэни оонньообут Майя Слепцованы оскуолаҕа буолбут көрсүһүүгэ тута көрөөт биллим. Оскуола оҕолоро Ньурба тыйаатырын  артыыстарын кытта бэрт истиҥник, иһирэхтик кэпсэттилэр. Артыыстар оҕолор биэрбит ыйытыктарыгар эппиэттээтилэр.  Онтон киэһэ Алексей Балакаев "Ийэ сүрэҕэ" диэн айымньытын оонньоон көрдөрдүлэр. Чахчы үчүгэй испэктээк! Ийэ оруолун - Сардана Михайлова, Миндьээ -  Вера Лазарева, Ойууна - Саха Өрөспүүбүлүкэтин үтүөлээх артыыһа Майя Слепцова, Саарка - Надежда Афанасьева, Саарка чаҕардара -  Олег Конощюк, Эдуард Ларионов, Пүрбээ - артыыс Никита Григорьев оонньууларын астына көрдүм. Ийэ барахсан сүрэҕэ - оҕоҕо. Бу дириҥ өйдөбүллээх оруолу Сардаана Михайлова наһаа үчүгэйдик толордо. Кини оҕотун туһугар долгуйуутун сүрдээх итэҕэтиилээхтик оонньоото. Кинини кытта тэҥҥэ ити турукка киирэр курдуккун. Онтон Саарка оруолун толорбут Надежда Афанасьева олус талааннаах артыыска буолара көстөр. Омсолоох дьоруой да буоллар, көрөөччүнү бэйэтигэр умсугутар кыахтаах эбит. Онон кини уобараһа өссө интэриэһинэй! Пүрпээни Саарка чаҕардара кэлэн ылыыларын хамсаныылара испэктээги олус тыҥааһынныыр, киэркэтэр, тэтимирдэр. Ити көстүүгэ хараҥа күүс бүтүн аан дойдуну даҕаны сабырыйыан сөптөөҕүн сэрэтэр курдук. Ол эрээри, сырдык, ыраас тапталтан олох тиллэрин, тылларын бу испэктээккэ көрөбүт. Ийэ сүрэҕэр оҕото өрүү баар! Оттон уоллаах кыыс тапталлара уостубат аналлаах. Миндьээ тапталыгар киһи итэҕэйэр. Майя Слепцова оонньуутун көрөр бэйэтэ - дьол! Ханнык да уобараһы кыайа-хото тутар артыыска. Ньурба тыйаатырыгар бу айымньы иккиһин туруута эбит. Бастакытын Саха АССР үтүөлээх артыыһа, режиссер Спартак Слепцов туруора сылдьыбыт. Онтон режиссер Юрий Макаров туруорбут. Бастакы оонньуутун эмиэ көрүөхпүн баҕаран кэллим. Худуоһунньук Дарья Тартакынова бэртээхэй үлэни оҥорбут. Барыта биир ситим. Сцена тыына, тыас-уус, муусука, ырыа, үҥкүү көрөөччүнү калмык омук дойдутугар сырытыннаран аҕалар курдук. Онон бэртээхэй киэһэни бэлэхтээбит Ньурба тыйаатырын артыыстарыгар барҕа махтал. Айар айымньылаах үлэҕит ситиһиилээх буоллун, үгүс көрөөччүнү баҕарабын. Игидэй нэһилиэгэр кэлэҥҥит ыалдьыттыы, саҥаттан саҥа испэктээги көрдөрө туруҥ.