Ньурба Саха сирин спортивнай оонньууларыгар бэлэмнэнэр

Ньурбаҕа тэрийэр кэмитиэт мунньаҕа ыытылынна, барыта былаан быһыытынан баран иһэрэ бэлиэтэннэ. Мунньаҕы СӨ Бырабыыталыстыбатын Бэрэссэдээтэлин солбуйааччы Сергей Местников салайда.

Сүүмэрдиир күрэхтэр сыл саҕаланыаҕыттан ыытыллаллар. Ол курдук, олунньуга Ленскэйгэ футзалга үрдүкү лига чемпионата буолбута, кулун тутарга — Тааттаҕа, Үөһээ Бүлүүгэ, Чурапчыга, Ньурбаҕа уонна Аммаҕа волейболга күрэхтэр, ону тэҥэ Дьокуускайга баскетболга квалификациялыыр күрэхтэр ааспыттара. Бэс ыйын 6 күнүгэр Ньурбаҕа фитнес-аэробикаҕа сүүмэрдиир күрэхтэр буолбуттара. От ыйыгар Дьокуускайга спортинг-компакка чемпионат буолбута.

Балаҕан ыйын 30 күнүттэн алтынньы 4 күнүгэр диэри «Кыайыы 50 сыла» спорткомплекска остуол тенниһигэр чемпионат ыытыллара былааннанар. Боксаҕа, көҥүл тустууга, чэпчэки атлетикаҕа, ох саанан ытыыга, дуобакка уонна саахымакка сүүмэрдиир күрэхтэр 2027 сыл былааныгар киирбиттэр.

Билигин Ньурба куоратыгар 3 тыһыынча миэстэлээх, чэпчэки атлетикаҕа манежтаах стадиону уонна Чэбдигирдэр комплексы, Чаппанда сэлиэнньэтигэр – модульнай спорт саалатын, Ньурбаҕа эмтиир куорпуһу уонна Антоновка сэлиэнньэтигэр интэринээттээх спорт дэгит көрүҥнэрин саалатын тутуу бара турар.

Былааҥҥа А.И. Пахомов аатынан спорт саалатын уонна «Олимп» спорт комплексын өрөмүөннээһин баар. Ньурбаҕа «Чистая вода» федеральнай бырагыраама чэрчитинэн сууккаҕа 1200 куб. миэтэрэ ууну ыраастыыр кыахтаах ыстаансыйа үлэҕэ киирбит.