Новосибирскайтан кэлбит көҥүлэ суох эт дьыалата салҕанар

Ол курдук, кулун тутар 22 күнүгэр Россельхознадзор Амур уобалаһыгар уонна Саха сиригэр управлениета Аллараа Бэстээх тимир суол станциятыгар Новосибирскайтан 45 туонна эти сымыйанан "оҕуруот аһа" диэн тиэммит контейнер кэлбитин быһаарбыта. 18 туонна «сибиэһэйдии тоҥоруллубут фрукта» уонна 26,9 туонна «спред» оннугар 100-тэн тахса көрүҥ сүөһү бородууксуйата тиэллэн кэлбитин иһитиннэрбиттэрэ. Оттон 3,5 туонна сибиинньэ, 3,5 туонна ынах уонна 100 кг бараан этигэр бэтэринээр докумуона суоҕа биллибитэ.

Дьокуускай урбаанньыта, «ОптАс» хампаанньа салайааччыта Ольга Николаева "Эхо столицы" иһитиннэрбитинэн, кини хампаанньата кэпсэнэр табаары улахан кээмэйдээх хантараак сорох чааһын быһыытынан сакаастаабыт.

Ол курдук, Ольга Николаева бөдөҥ сакаасчыты кытта дуогабарга эбэһээтэлистибэтин иитинэн 18,5 мөл. солк. суумалаах табаары сакаастаабыт. Атыы оҥоһуллуохтаах кэмигэр Саха сиригэр ирдэнэр бородууксуйа суох буолан, Новосибирскайы кытта дуогабардаһарга күһэллибит. Сэтинньи ыйга Новосибирскайтан урбаанньыт Наталья Зажецкайаны кытта үлэлэһэн саҕалыыр. Кэпсэтии быһыытынан, 7 туонна премиум-кылаастаах эти ыытыахтаахтар эбит.

Олунньу ый саҥатыгар Николаева сакаастаабыт табаарын сыанатын 100% төлөөбүт. Ол кэннэ ый бүтүүтэ номнуо табаара «Трейд-транс» тырааныспар хампаанньатыгар номнуо тиксэриллибит диэн буолбут. Онтон кулун тутар 2 күнүгэр күүтүүлээх контейнера Саха сиригэр айаннаабыт.

Табаар бэтэринээр докумуона суох ыытыллыбытын Ольга Николаева кулун тутар 15 күнүгэр эрэ туора дьонтон билбит. Онтон сылтаан  поставщигы кытта сибээскэ тахсыбыт.  

«Зажецкая докумуоннары кэлин ыытыахпыт диэбитэ, кинилэр үлэлэригэр оннук практика баар үһү. Мин ону кытта сөпсөспөккө, Россельхознадзорга үҥсүү киллэрбитим», — диир Николаева.

Инньэ гынан, бэйэтин сакаасчытын иннигэр эбэһээтэлистибэтин толорор кыһалҕаттан аны Дьокуускайтан эт көрдүүр. Хайыы үйэ ыараабыт сыанаҕа түбэһэн, 1,4 мөл. солк. ороскуотурар. Ол түмүгэр хоромньутун уопсай кээмэйин 4,6 мөл. солк. сыаналыыр.

Николаева маны таһынан тырааныспар хампаанньатын эмиэ буруйдуур. Кини этэринэн, таһаҕаһы тиэйээччи бэтэринээр докумуона баарын бэрэбиэркэлиэхтээх этэ.

«Ааһа баран, докумуоннар сымыйа табаары кэрэһилииллэр: биир контейнерга спред арыы баарын курдук көрдөрөллөр, иккискэ — тоҥ оҕуруот аһа», — диир Николаева.

Тахсыбыт быһылаанынан урбаанньыт суукка үҥсүү түһэрэн, ороскуотун толуйтарар санаалаах. Бэрэбиэркэ салҕанар.