Норуоттар икки ардыларынааҕы Бэргэн ытааччы турнира буолуоҕа

Сэбиэскэй Сойуус дьоруойа Ф.М.Охлопков аатынан норуоттар икки ардыларынааҕы быйылгы IV турнирга 200-тэн тахса бэргэн ытааччы кыттара сабаҕаланар.

Турнир алтынньы 8 -11 күннэригэр Дьокуускайдааҕы «Сулус» полигоҥҥа буолар.

Күрэх тутаах судьуйата –  РФ Бырабыыталыстыбатын солбуйааччы, РФ бэрэсидьиэнин Уһук Илиҥҥэ боломуочуйалааҕа  Юрий Трутнев.

Бу успуорт киэҥ хабааннаах тэрээһинин Уһук Илин боломуочуйалаах бэрэстэбиитэлин аппараата, СӨ Бырабыыталыстыбата, «ВОИН» дойду бойобуой снайпинын Федерацията, Байыаннай-спорт бэлэмнэниитин киинэ уонна Бойобуой ускуустуба сойууһа тэрийэн-бэрийэн ыыталлар.

Бу туһунан Ил Дархан Айсен Николаев:

«200-тэн тахса кыттааччы баар буолара сабаҕаланар. Быйылгы бырагыраамаҕа хамаанданан турнирга аан бастакытын  16-18 саастаах уоланнар уонна кыргыттар кыттыахтара. Онно Уһук Илин 11 эрэгийиэниттэн 33 эдэр ытааччы киирсиэҕэ».

Бу турнирга байыаннай сулууспалаахтары уонна силовой биэдэмэстэр үлэһиттэрэ, инструктордар састааптара уонна биирдиилээн, гражданскай дьон кытталлар.

*Күрэхтэһиигэ иккилии буолан кытталар.  Биир кыттааччы ытар, иккиһэ кэтээн көрөөччү, чопчулаан биэрээччи буолар.

Бырагыраама икки блоктаах: күнүскү уонна түүҥҥү ытыы.  Сытан эрэ (положение «лежа»)  1100 м саҕалаан,  3500 м диэри ыраахха ыталлар.
Быйылгы турнирга көрөргө ордук интэриэһинэй, тыҥааһыннаах буоларын курдук, арыый уларытан биэрбиттэр:
Квалификация уонна тутаах түһүмэхтэр хас да паараҕа биир кэмҥэ тэҥинэн буолаллар. 1700 м ыраах дистанцияҕа кыттааччылар 3 боеприпаһы туһанар кыахтаахтар, оттон 2200 м диэри ыраахха – эрчиллиилэри толорору учуоттаан, 4 боеприпас көҥүллэнэр.

Тэрийээччилэр Росавиацияны кытта сөпсөһүннэрэн, биир тутаах логистическай соругу быһаарбыттар. Кыттааччылар боеприпастарын лимиитин 15 кг диэри улаатыннарбыттар (муҥутаан 5-тии кг 3 кейс).  Бигэргэтэр докумуоннары ылар гына, ытааччылар күрэхтэһиигэ кыттар тэриллэрин калибрын уонна ыйааһынын бу почтаҕа ыытыахтарын наада: combatsniper@bk.ru.

Кыайыылаахтарга уонна бириистээх миэстэлээхтэргэ күндү тимир эквиваленынан харчынан бириэмийэ туттарыллар. Бастакы миэстэлээххэ 250 гр кыһыл көмүс сыанатын саҕа үп, иккис миэстэлээххэ – 100 гр кыһыл көмүс сыанатын саҕа, үһүс миэстэлээххэ – 50 гр кыһыл көмүс сыанатын саҕа.

Күрэхтэһиигэ кыттыы иһин кыттааччылар харчы төлөөбөттөр.

Тэрээһин чэрчитинэн высокоточнай армейскай ытыыга 16-тан 18 сааһыгар диэри уоланнар уонна кыргыттар кыттыахтара.

Турнирга кыттыа баҕарааччылар сайаапка толорон баран, пааспардары скан-куопуйатын холбуу хачайдаан баран, ok@dfo.gov.ru электроннай аадырыска ыыталлар (ыытар болдьоххо балаҕан ыйын 20 күнэ толору киирсэр). Логистика уонна боеприпастары таһыы уонна күрэх толору регламенын ылыы чааһыгар бу +7 (926) 860-10-18 төлөпүөн нүөмэригэр эрийэн биитэр combatsniper@bk.ru почтаҕа ыытан ыйыталаһыахха сөп.

Бу туһунан Ил Дархан уонна СӨ Бырабыыталыстыбатын пресс-сулууспата иһитиннэрдэ.