Норуот тапталын ылбыт Евгений Григорьев. Тус олоҕун туһунан тугу билэбит?

Баһылыкка, дуоһунаһыттан барыан иннинэ, олохтоох бэйэни салайыныы уонна социальнай-экономическай сайдыыга кылаатын иһин “СӨ Норуотун хаһаайыстыбатын үтүөлээх үлэһитэ” бочуоттаах аат иҥэрилиннэ.

СӨ Ил Дархана Айсен Николаев уонна Куорат дууматын бэрэссэдээтэлэ Альберт Семенов бииргэ үлэлэспиттэрин иһин махтаннылар. “Евгений Николаевич үгүһү оҥордо”, – диэтэ Ил Дархан.

Евгений Николевич б.дь. от ыйын 16 күнүгэр дуоһунаһыттан болдьоҕун иннинэ бэйэтин баҕатынан тохтуурун туһунан биллэрбитэ, сайабылыанньатын дьокутааттарга киллэрбитэ. Ол иннинэ бииргэ үлэлиир кэллиэгэлэрин, Олохтоох дьаһалта араас салааларын үлэһиттэрин кытта өйдөбүнньүк хаартыскаҕа хатаммыта, от ыйын 17 күнүгэр, бүтэһик үлэтин күнүгэр, дьаһалтаҕа бииргэ үлэлээбит кэллиэгэлэрин кытта бүтэһик мунньаҕын ыыппыта. “Мин мээр быһыытынан үлэм дьоҥҥо көрдөрөр түмүктээх. Онон дьон хараҕын кыбыстыбакка утары көрөр кыахтаахпын. Бүгүн үлэм тиһэх күнэ”, – диэбитэ Евгений Григорьев. Кэлэктиип салайааччытын ытыс хабыллар тыаһынан атаарбыта.

Норуот тапталын ылбыт, туруу үлэһитинэн бар дьонугар  сөбүлэппит Евгений Григорьев тус олоҕун туһунан тугу билэбитий? Биһиги урукку-хойукку интервьюларга баар информацияны түмтүбүт.

Евгений Григорьев Дьокуускай куорат баһылыгынан үлэтин 2021 сыл муус устарыгар быыбардааччылар 44,27% куоластарын ылан саҕалаабыта. 2026 сыл балаҕан ыйыгар диэри үлэлиэхтээҕэ.

Кини чугас дьонун олус харыстыырыттан тус олоҕун туһунан элбэҕи кэпсээбэт, ол иһин информация аҕыйах.

Евгений Григорьев кэргэнин аата Юлия. Кини Хаандыгаҕа улааппыт, нууччалыы иитиилээх. Нуучча уонна саха хаана булкуспут дьонун “бааһынай” диэн ааттыыбыт.

Үс оҕолоохтор. Икки кыыс (19 уонна 6 саастаахтар), биир уол (5 саастаах).

Григорьев хас да интервьютугар оҕолорун сахалыы иитэрин кэпсээбитэ. Дьиэ иһигэр сахалыы эрэ кэпсэтэр кытаанах быраабылалаахтар эбит – оҕолорун ийэ тылларыттан тэйитимээри инник быһаарыммыт, ону чугас дьоно өйөөбүттэр. Кэргэнэ нууччалыы иитиилээх буолан бастаан утаа ыарырҕаппыт эрээри, аҕаларын быһаарыныытын толору өйөөбүт.

Оҕолоро спорка сыстаҕастар, сиэксийэлэринэн ийэлэрэ таһар. Гаджеттары туттар бириэмэлэрэ хааччахтаах.

Евгений Григорьев оҕолоругар кытаанаҕын, ирдэбиллээҕин, атаахтаппатын этэн турардаах. Былырыын улахан кыыһа Нария профильнай математикаҕа Биир кэлим эксээмэнин 97 баалга туттарбытын бэйэтин тг-ханаалыгар суруйбута. 

Биир интервьютугар дьиэ кэргэн аҕа баһылыга эр киһи – булар-талар, хааччыйар, оттон ыал ийэтэ дьахтар дьиэни-уоту иччилиир, аал уоту араҥаччылыыр оруоллааҕын бэлиэтээбитэ. “Кэргэним атын сиргэ үлэлээбэт, дьиэтинэн уонна оҕолорунан эрэ дьарыктанар”, – диэбиттээх.

Дьиэ кэргэн үтүө үгэһэ – саҥа дьылы Чочур Мыраан үрдүгэр аал уоту оттон, уот иччитигэр айах тутан көрсөллөр.

Оҕолор уһуйааҥҥа, оскуолаҕа ким оҕолоро буолаллара биллибэккэ, дьон болҕомтотун тардыбакка, аҕаларын дуоһунаһыттан мэһэйдэппэккэ сырыттынар диэн, дьиэ кэргэн туһунан кэпсээбэт, киэҥ эйгэҕэ таһаарбат туһунан бары биир сүбэнэн быһаарыммыттарын кэпсээн турардаах.

Маны таһынан, Евгений Григорьев күннэтэ спордунан дьарыктанар, оҕо сылдьан боксанан күүскэ үлүһүйэ сылдьыбыт, ДЮСШ иитиллээччитэ. Чөл олоҕу тутуһар. Үлэлээбитин тухары арыгы атыытын уодьуганныыр утумнаах үлэни ыытан кэллэ. Сноубордунан дьарыктанар. Матасыыкылынан сылдьарын ордорор. Бу сыллар тухары Үс Хатыҥҥа буолар Туймаада Ыһыахтарыгар баһылык түһүлгэттэн түһүлгэҕэ бэлисипиэтинэн сылдьарын элбэх киһи көрөрө. Астан сарсыарда аайы ийэтэ оҥорор күөрчэҕин ордорорун, 40 сааһыгар диэри күн аайы ийэтин сыллыыр дьоллооҕун бэлиэтээбитэ. Нэһилиэнньэни кытта көрсүһүүлэрин, атах тэпсэн олорон кэпсэтиилэрин киһи ааҕан сиппэт.

Евгений Николаевичка ситиһиилэри, табыллыыны, кэскили түстүүр үлэни баҕарабыт!