Норуот маастара кэргэним Мария Сидорова туһунан

Кини олоҕун кэнники алта сылыгар суорҕаҥҥа-тэллэххэ муҥу-сору көрө сыппытынан «эрэйдээх» диэн тылы тутуннум. Ойоҕум Сидорова Мария Михайловна элбэх оҕолоох ыал улахан кыыстара уонна, ийэтэ иистэнньэҥ буолан, балыстарын көрүүгэ-харайыыга элбэх сыратын биэрбитэ. Ол эрээри тоҕо эрэ элбэхтик саҥарыллааччы кини буолара үһү. Ону истэ сатаан баран эһэтэ оҕонньор биирдэ эппит: «Ити кыыскытын тоҕо олус саҥараҕатый, хата, ити кыыскыт ыраатыаҕа”.

Оҕонньор эппитин курдук, Мария Михайловна, кырдьык, ыраатан, Дьокуускайга олохсуйдаҕа уонна СӨ Бочуоттаах норуот маастара буоллаҕа. Манна кэлэн баран итэҕэл, айыы үөрэҕин, кут-сүр, сиэр-туом эҥин туһунан интэриэһиргиир буолбуппут. Биирдэ Сайыына Максимова кэргэнниилэри чэпчэтиилээх үөрэххэ ыҥырбытыгар тиийдибит. Эмээхсиммин көрөөт, “эйигин ылбаппын” диэтэ. Биһиги соһуйан эрэ хааллыбыт, тоҕотун токкоолоһо барбакка, төнүннэхпит дии.

Өлбүтэ биир сыла туоларыгар кутурҕан-кэриэстэбил суруйан баран, ыраастык суруйуом диэн, паапкабар укпутум. Сарсыныгар көрбүтүм – суох. Дьиктиргээтим, бобор эбит дии санаатым.

Тиһэх суолугар атаарарбытыгар Новосибирскайтан сиэнэ кыыс кэлбитэ. Өйүүнүгэр кыыс, оҕоломмот буолан, киһи ауратын көрөр көрбүөччүгэ сылдьан ыйыталаспытыгар: “Эбэҥ дьону кытта сылдьар, кинилэргэ салайааччы курдук көстөр. Света куттамматын, уол оҕо баар буолуо диэтэ”, – диэн бэрт үчүгэй илдьити тиэрдибит. Кырдьык, эһиилигэр, 36 сааһыгар, Светабыт уолламмыта.

Эдэр эрдэххэ эргилиннэххэ, Мииринэй Таас Үрэҕэр мин отуттаахпар, төрөөбүт ыйбар, күммэр, бастакы уолбут төрөөбүтэ. Иккис уолбутун сайдыылаах сиргэ Мииринэйгэ оҕоломмута. Быраастара силигин ситэрэн баран “палаатаҕар бар” диэбиттэр. Ону, палаататын нүөмэрин өйдөөбөтөх буолан, балай эмэ хаампыт. Ол түмүгэр маатката санньыйан, сиһэ тоҥор идэлэнэн, саарпыктарынан хаттык оҥостон кэтэ сатаабыта туһалаабакка, 28 сааһыттан 82-гэр диэри эрэйи көрө сылдьаахтаабыта.

Кэргэним төрөппүттэрэ холкуос ыарахан үлэтигэр мүккүллүбэтэхтэрэ эрээри, эдэрдэригэр, 51-52 саастарыгар, бу олохтон барбыттара. Мария Михайловна кинилэрдээҕэр отут сыл ордук, миигинниин 58 сыл олорон баран ол дойдуга бараахтаабыта. Элбэх ыарыы эмпэтэҕэ буоллар, өссө да олорбохтоһуохтааҕа.