Нолуок декларациятын МФЦ-га туттарыахха сөп

Арассыыйатааҕы ФНС Саха сиринээҕи управлениета иһитиннэрбитинэн, кулун тутар 31 күнүттэн элбэх функциялаах кииннэр толорор өҥөлөрүн испииһэгэр «Прием налоговой декларации по налогу, уплачиваемому в связи с применением упрощенной системы налогообложения (УСН)» диэн өҥө эбиллибит.

Бу өҥөнөн кимнээх туһаныахтарын сөбүй?

- Саха сиригэр олорор регистрациялаах урбаанньыттар.

- Саха Өрөспүүбүлүкэтигэр баар уонна нолуок декларациятын судургутуллубут нолуок систиэмэтинэн туттарар юридическай сирэйдэр.

Бу өҥөнү оҥорторорго туох даҕаны эбии төлөбүр, судаарыстыбаннай түһээн ааҕыллыбатын бэлиэтиир тоҕоостоох.  

Нолуок декларациятын туттарарга туох докумуон ирдэнэрэ:

УСН нолуок декларациятын (КНД 1152017) оригинала, сайаапкалааччы кимин туоһулуур докумуон; бэрэстэбиитэл тиийэр түгэнигэр, нотариус бигэргэппит дэбиэринэһэ (оригинала уонна куоппуйата); РФ территориятыгар гражданствота суох атын дойду олохтооҕо буоллаҕына, РФ-га олорор быраабын бигэргэтэр докумуон.

Үлэлии олорор элбэх функциялаах кииннэр аадырыстарын Арассыыйа нолуокка сулууспатын саайтыгар «Информация о МФЦ в вашем регионе» разделга билсиэххэ сөп.