Николай Жирков кэриэһигэр боксаҕа күрэхтэһии саҕаланна

Бу түһүлгэ аатырбыт боксер, спорт аан дойдутааҕы кылаастаах маастара Николай Жирков сырдык кэриэһигэр ананар. 1 нүөмэрдээх спортивнай оскуола киэҥ саалатыгар турбут рингэҕэ 153 эдэр боксер тахсыаҕа, барыта 19 хамаанда бэрт былдьаһар.

"Киин куораппыт аатын-суолун 15 уол састааптаах хамаанда көмүскүүр, – диэн кэпсиир сүрүн тренер Аркадий Ушканов. – Күрэхтэһии иннинэ Дьокуускай баһылыга Е.Н. Григорьев хамаанданы кытта көрсөн ситиһиини, кыайыыны-хотууну баҕарда, эдэр спортсменнарга куорат бэлиэлээх футболкалары бэлэхтээтэ, санаабытын көтөхтө".

Туймаада ыччаттара боксаҕа өрүү инники кэккэҕэ сылдьааччылар. Ол эрээри күүстээх састааптаах Нерюнгри, Мэҥэ Хаҥалас боксердара кыайыыга дьулуурдара эмиэ бигэ. Онон сытыы күөн күрэс күүтүллэр. Кыайыылаахтары олунньу 7 күнүгэр билиэхпит.