Никита Аянитов «Олоҥхо-баттл» кыайыылааҕа буолла уонна 500 тыһ. солк. наҕараадаланна

Санатар буоллахха, Гран-при аатын бырайыак финалыгар хаалбыт алта бастыҥ эдэр олоҥхоһут былдьаспыта: Айтал Винокуров, Марфа Аммосова, Никита Аянитов, Сандаара Слепцова, Полина Горохова уонна Эрик Егоров.
Кинилэртэн 2164 куолаһы ылбыт Марфа Аммосова көрөөччү биһирэбилин ылан, «Саха» НКИХ гендириэктэрэ Олег Марковтан 100 тыһ. солк. суумалаах сэртипикээти тутта. Ил Дархан испипиэндьийэтин хаһаайына, СӨ үтүөлээх артыыһа Валентин Исаков Айтал Винокуровка – «Кэскиллээх олонхоһут», Полина Гороховаҕа «Кэрэмэс олоҥхоһут» анал ааттары туттарда.

Бэлиэтээн эттэххэ, күрэх биэс түһүмэхтэн турбута. Түмүктүүр түһүмэххэ кыттааччылар Былатыан Ойуунускай «Дьулуруйар Ньургун Боотур» олоҥхотуттан быһа тардыыны араас омук тылынан толорбуттара: Айтал Винокуров – эбээннии, Никита Аянитов, Марфа Аммосова – английскайдыы, Сандаара Слепцова – нууччалыы, Полина Горохова – французтуу, Эрик Егоров – туроктыы. Маны сэргэ бэриллибит тиэмэҕэ толорууга, аныгы кэм туһунан олоҥхону суруйан толорууга күрэхтэспиттэрэ.

Бырайыак өрөспүүбүлүкэ бырабыыталыстыбатын, Олоҥхо ассоциациятын, Олоҥхо тыйаатырын, М.К. Аммосов аатынан ХИФУ иһинэн Олоҥхо институтун өйөбүллэринэн ыытыллар.

Күрэх СӨ судаарыстыбаннай уонна официальнай тылларын харыстааһын уонна сайыннарыы судаарыстыбаннай бырагырааматын иитинэн ыытыллар. Оттон Саха сиригэр 2006 сылтан сэтинньи 25 күнүгэр 2005 сыл сэтинньи 25 күнүгэр ЮНЕСКО саха олоҥхотун аан дойду материальнайа суох нэһилиэстибэтинэн билиммитин бэлиэтигэр Олоҥхо күнэ олохтоммута, диэн Ил Дархан уонна Бырабыыталыстыба пресс-сулууспата иһитиннэрэр.