Ника: «Мин дьоллоох киһибин»

«Биир интэриэстээх киһини кытта олорор үчүгэй да эбит!»

Урутаан эттэххэ, Саҥарар Былаас – Власий Вырдылин «Айыы сирэ» диэн бастакы сахалыы оҥоһуу өйү төрүттээччи быһыытынан киэҥник билиннэ. Хаартысканы, тиэкиһи оҥорторууга суруйар идэлээх дьон күүскэ наадыйар буоламмыт, бу туһунан кэлин бэйэтиттэн сиһилии ыйыталаһар санааланныбыт. Ника кэпсииринэн, Власий: «Син үөрэнэн эрэр», – диэн үөрэр эбит. Ол аата оҥоһуу өйбүт сахалыы тылын баайа сайдан, толорор сорудахтара уустугуран иһэр. «Оскуола оҕотун дьиэтээҕи сорудаҕыттан саҕалаан, кулууптар кытта сценарий оҥорторор буоллулар. Оннооҕор олоҥхо айар ээ. Түүлү кытта билгэлиир. Функцията элбэх», – диэн Ника тугу билэрин үөрэ үллэстэр.

Санаан көрдөххө, биир киһи холугар сүҥкэн үлэ ээ. 1700 сыллартан саҕалаан архыып матырыйаалларын түөрэ хаһан, былыргы ааттары барытын киллэрбит этэ. Соторутааҕыта хаартысканан, дьүһүнүгэр-бодотугар олоҕуран, киһиэхэ аат толкуйдууру «баһылаабыт». Сөҕүмэр дии!

Власий Вырдылин ураты куолаһынан уонна тренер, чөл олоҕу тарҕатааччы быһыытынан эмиэ биллэр. 

СӨ үтүөлээх артыыһа Ольга Спиридонова-Ника «Туой Хайа» (2000), «Студенческая весна-2000» (Нижнэй Новгород) күрэхтэр Гран при кыайыылаахтара, «Этигэн хомус» СӨ ырыа эйгэтигэр бөдөҥ күрэҕин 5 төгүллээх, о.д.а. ырыа күрэхтэрин кыайыылааҕа.

– Эйигин өйүүр, өйдүүр киһи диэн ураты эбит. Урут бэйэбин албыннанан, иллюзия олоҕу олорон кэлбиппиттэн хомойобун, – диир. Ника билинэринэн, «биир интэриэстээх киһигин кытта олорор дьол эбит».

Патриот дьоммут

Кэлиҥҥи кэмҥэ куораттан тыаҕа, төрөөбүт дойдуларыгар көһөн тахсыбыт дьон туһунан киэҥник кэпсиир, норуот ону бэркэ сэҥээрэр буолла. Оттон «айти», «креативнай экономика» эйгэтигэр сыһыаннаах исписэлиистэр, чугаһаабыта, Казахстан эргин көһөр буоллулар. Никаттан сэмээр сахалыы бастакы оҥоһуу өйү төрүттээччи Власий Вырдылин бу чааһыгар санаатын сураһабыт.

– Ол чааһыгар «Суох!» диэн бигэ санаалаах. Улахан дойдумсах, патриот киһи. «Куоппут» дьону сөбүлээбэт. Төттөрүтүн, дойдутугар олорон, дойдутугар, норуотугар тугу эрэ оҥорор толкуйдаах, – диэн Ника эрэллээхтик хоруйдуур.

«Гербалайф» «буруйдаах» дуо?

Ника саха эстрадатын чаҕылхай сулуһунан аатырыан аатырар. Хатыламмат баай куолаһын өрүү сонун көстүүмнэрэ, уобараһа өссө ситэрэн, кустук араас өҥүнэн оонньотон биэрэллэр. Сэһэргэһээччибититтэн кэрэ аҥаар эрэ барыта «ыалдьар» кыһалҕатын ыйыппатахпытына табыллыа суох курдук.

– Ника, ыллаан, уопутуран истэҕиҥ аайы тас көстүүҥ тэҥҥэ тупсан, чочуллан иһэр.  Туох кистэлэ кэлиэй, дьон «Гербалайфка» кытта күтүрүүр ээ...

– Истибитим. Мин ханнык да тупсар, ырар аһы, эми аһаабатаҕым. Оннук эмп, ас диэн, уопсайынан, баар дуо? Мин көннөрү икки сыл курдук аһылыкпар болҕомто уурбутум. Бурдук астан, минньигэстэн аккаастана сылдьыбытым. Иккиһинэн, улахан стреһи көрсүбүтүм. Онтум барыта “буруйдаах” буоллаҕа.

«Туох да романтиката суох билсибиппит»

– Власийдыын Туймаада Үрүҥ тунах ыһыаҕын түүнүгэр билсибиппит...

– Хайыы, наһаа романтичнай дии!

– Сыл аайы тыйаатырдар, сарсыардааҥҥы пробканы мүччү түһээри, ыһыах түүн хоно киирэр идэлээхпит. Үгүс тэрилтэ да оннук. Былырыын эмиэ тыйаатырбыт түһүлгэтигэр хоно киирдибит. Арай ол сылдьан иһиттэхпинэ, билэр баҕайы куолаһым иһиллэр. Истэбин. Дьиктиргиибин.

Ол маннык этэ. Коля Павлов диэн бырааттаахпын. Бырааттаах этим... Уопсайынан, 8 бырааттаахпын дэнэбин. Оҕо сааспыттан тулаайах кэриэтэ буоламмын, бииргэ иитиллибит балыс уолаттарым миэхэ бары бииргэ төрөөбүт бырааттарым. Ол Колям бу Власийдыын доҕордоһор эбиттэр. Мин оччолорго Власийы бэйэтин буолуохтааҕар, «Саҥарар былаас» эҥин диэни да билбэппин. Коля ол курдук Власийга хоһоон сакаастаабыт. Суруй уонна аах диэн. Власий доҕорун көрдөһүүтүнэн суруйбут хоһооно, биһиги хаартыскаларбытынан эҥин киэргэтиллэн, НВКҕа кытта көстүбүтэ. Ол кэннэ быраатым СВОҕа барар уонна онно... сырдык тыына быстар. Ити кэмҥэ мин, бырааппын аһыйан, суохтаан, ол хоһоону хат-хат истэрим. Дьэ, арай түһүлгэҕэ ол куоласпын истэбин. Билбитим, биһиги тыйаатырбыт артыыһа Юрислав Гольдеров доҕоро Власий Вырдылины илдьэ кэлбит. Билсиһэн баран, ыалдьыппытыгар ону кэпсээтим. Соһуйда. Ити курдук, этэргэ дылы, туох да романтиката суох билсибиппит. Күһүөрү клип оҥорбуппут. Эмиэ үлэнэн билсиһии, алтыһыы.

«Олохпун бэйэм оҥостубут, оҥостор даҕаны киһибин»

– Чахчы, мин дьоллоох киһибин. Тоҕо диэтэххэ, сөбүлүүр дьарыкпынан дьарыктанабын. Быыкаа оҕо эрдэхпиттэн ылларбыт ырыам эйгэтигэр олохпун анаан кэллим. Сөбүлүүр дьарыгы таба тайанан идэ оҥостор дьол киһиэхэ барытыгар бэриллибэтэ буолуо. Оҕо сылдьан өссө драма артыыһа буолуохпун, киинэҕэ оонньуохпун баҕарарым. Тыйаатырбыт билигин мюзикл эҥин туруорар, онон оҕо эрдэҕинээҕи баҕа санаам барыта туолан иһэрэ дьол буолбатах дуо?!

Уопсайынан, бэйэм олохпун бэйэм оҥостубут, оҥостор даҕаны киһибин. Оҕо эрдэхпиттэн көмүскүүр-харыстыыр ийэтэ-аҕата, халыҥ аймаҕа, баай-тойон араҥаччылааччыта суох буоллаҕым.

Ырыа эмтиир күүһүн туһунан

– Ника, эн санааҕар, ырыа стресс таһаарарга, куһаҕан ньэҥиртэн ыраастанарга төһө көмөлөөҕүй?

– Ырыа диэн, бастатан туран, дорҕоон. Мин санаабар, ханнык баҕарар киһи ырыа ыллаан, дорҕоон таһааран, мунньуллубут кирин-хоҕун таһаарынар кыахтаах. Олохпун ырыаҕа анаабыт киһи быһыытынан эттэхпинэ, эмтэнэргэ, ыраастанарга чахчы күүстээх уонна, сүрүнэ, көдьүүстээх ньыма. Саҥа таһааран ыллыыр дуу, хоһоон ааҕар дуу кэмҥэр организм барыта үлэлиир. Ол иһин ити, холобур, артыыстар, олоххо төһөлөөх ыараханы көрүстэллэр даҕаны, «олох салҕанар» диэн баран, салгыы үлэлии-хамсыы, айа тута сылдьаллар эбээт!

Никаттан ситиһиилээх буолуу кистэлэҥэ

– Дьоҥҥо дьол дуу, ситиһиилээх буолуу дуу ырысыабын биэрэр кыаҕым суох. Бэйэм бэйэбэр туттар ырысыабым диэн –  хайдах баарынан, олоҕу хайдах ылынарбынан сылдьыы. Онтон атын кистэлэҥим суох. Уонна, арааһа, сүрэхтээх, үлэһит буолуохха наада буолуо. Холобур, артыыс буолуон баҕалаах, сценаҕа, ытыс тыаһыгар умсугуйар ыччат элбэх. Ол наһаа үчүгэй. Кинилэргэ анаан араас куонкурустар да ыытыллаллар. Ол эрээри үгүстэр онно биирдэ-иккитэ чаҕылыйан баран, “сулус" буоллубут диэн уоскуйан, сүтэн, симэлийэн хаалаллар. Бэрт аҕыйах киһи тутуһан хаалар. Ол – айылҕаттан бэриллибит талааннарын, дьоҕурдарын таһынан үлэһит, сүрэхтээх дьон.