Нерюнгритааҕы ГРЭС-и чөлүгэр түһэрии хайаста?

Бөөлүүн түүн уу сылытар котеллары сылытыыга үлэлэспиттэр. Хочуол оттугу биэрэр турбатынан мазут үчүгэйдик сүүрүгүрэрин курдук, сөптөөх  тэмпэрэтиирэни ситиһээри балачча моһуогурбуттар. Билигин мазут температурата үрдээн, форсункаларга тиийэр кыахтанан, хочуоллары үлэлэтэр кыах баар курдук буолбут. Ыстаансыйа тутаах котлоагрегаттарын үлэҕэ бэлэмнииллэр. Хаабылы уларытар, олордор биригээдэлэр сорудахтарын толоро сылдьаллар. Үһүс котлоагреты муҥутуур кылгас кэм иһигэр холбуурга суоттаналлар.

Олорор дьиэ пуондатын, оскуола, уһуйаан тутууларыгар тэмпэрэтиирэ төһө-хачча буолан турарын кэтээн, кэмнээн көрүү салгыы ыытыллар. Олус тымныйдаҕына үөрэх хаамыытын тохтотор туһунан быһаарыы ылыллыахтаах.

Оттон МЧС-ка уонна социальнай блокка, поселениелар баһылыктарыгар салайар управлениелары кытта ыкса бииргэ үлэлэһэн, баһаар тахсар кутталын суох гыныыга үлэлэһэллэрин курдук сорудах бэриллибит.

Уһук Илиннээҕи сүрүннүүр хампаанньаҕа тэрилтэ бэлэмнээх буолуутун таһымын үрдэтэригэр этиллибит. Эрдэ-сылла тутуулары  сылытыыга туттулар эбии сириэстибэлэри – сылааһынан үрэр пушкалары парогенератордары, кабеллаах бородууксуйаны, муфталары уонна да атын матырыйааллары эбии булунар наадатын ыйбыттар.

Наада тирээтэҕинэ оройуон атын хаһаайыстыбаннай субъектарынр көмөҕө кытыннарыахтара. Иккис сууккаларын тохтоло суох үлэлии сылдьар биригээдэлэри солбуйарга этиллибит.

Якутскэнерго хампаанньаҕа уонна энерго-тиһиккэ генерациялаах тэрилтэлэргэ төһө-хачча саппаас уматык баарын былааны таһынан, өссө эбии эрэбиисийэлииргэ сорудахтаабыттар. ГРЭС үлэтин чөлүгэр түһэрэр гына суукканы эргиччи, тохтоло суох үлэ эрэйиллэр. Ону тэҥэ балаһыанньаны булгуччу кэтии-маныы сырыттахха табыллар буолбут.

Халлаан тымныйа илигин баттаһа, хочуоллары үлэлэтэр сыал күүскэ турар. Күнү-дьылы кэтээн көрөр тэрилтэлэр саайтарыгар көрдөххө, билиҥҥитэ Нерюнгрига күнүһүн  +12-+14 кыраадыс сылаас, бүгүн түүн -0 С кыраадыс буолара сабаҕаланар. Өрөбүлтэн саҕалаан, күнүһүн +6-+9 С кыраадыска тиийэ сөрүүдүйэр. Түүнүн -1- -2 С кыраадыс буолар чинчилээх. Гисметео сайтыгар кэлэр сэрэдэҕэ күнүһүн да, бэркэлээтэр +3С эрэ буолара көстөр. Биллэн турар, күн-дьыл туруга, этэргэ дылы, баҕарбытынан, уларыйар-тэлэрийэр. Онон хайдах да балаһыанньаҕа бэлэмнээх буолуу наадата өйдөнөр.

Нерюнгри, өрөспүүбүлүкэ олохтоохторо долгуйаллара оруннаах. Тымныы дойду дьонугар, уопсайынан даҕаны, ГРЭС үлэтэ быстах да кэмҥэ тохтуура – алдьархайга тэҥнээх.

Ол да буоллар, санааны түһэриллибэт, үлэ тиһиктээхтик барар, саахал түмүгэ туоратыллан, сотору кэминэн дьиэлэргэ, тутууларга сылаас холбоноругар эрэниэҕиҥ. Сүрүнэ, маннык быһыы-майгы тымныы ыйдарга хаһан да буолбатар ханнык. 


Санатар буоллахха, балаҕан ыйын 22 күнүгэр Нерюнгри ГРЭС-игэр 1-кы нүөмэрдээх энергоблок трансформатордаах подстанция уонна машиннай саала турбинатыгар умайыы тахсыбыта. Биир киһи буруоттан биллэ эмсэҕэлээбитэ. Уот ыстаансыйатын үлэтэ тохтуу сылдьыбыта.  Ол эрээри уотунан хааччыйыы тохтооботоҕо. Ыстаансыйа сылааһынан толору хааччыйарын ситиһии – тутаах сорук буолбута. ГРЭС-кэ баһаар тахсыбытын түмүгэр улахан өрөмүөн үлэтэ күүтүллэрэ эрдэттэн сэрэтиллибитэ. Нерюнгри куораты сэргэ Серебрянай Бор бөһүөлэгэ эмиэ сылааһынан хааччыллыыта суох хаалбыта. Умайыы тахсыбыт ГРЭС-э Саха сирин соҕуруу эҥээригэр үлэлиир биир бөдөҥ ыстаансыйа. Нерюнгри, Серебрянай Бор олорор дьиэлэрин, хаһаайыстыбаннай эбийиэктэри сылааһынан хааччыйарын таһынан чугас түстэммит бырамыысыланнас эбийиэктэрин эмиэ сылытар. Быһата, тыын суолталаах эбийиэк.