Нефтебаза хаһаайыстыбаларын туруга долгутар

Кулун тутар 25 күнүгэр буолбут Ил Түмэн 18-с пленарнай мунньаҕар СӨ Ааҕар-суоттуур палаататын (мантан салгыы – АСП) 2025 сыллааҕы үлэтин түмүгүн бэрэссэдээтэл Алена Федорова иһитиннэрдэ. Бу туһунан Ил Түмэн пресс-сулууспата тугу суруйбутун салгыы билсиэҕиҥ.

Бэрэбиэркэҕэ хабыллыбыт 18 нефтебаза оборудованиеларын эргэриитэ... 80% тэҥнэһэр. Ону саҥардыы (реконструкция) олус бытааннык барар. Ол быыһыгар, Орто Халыма нефтебазатыгар анаан 2022 с. атыылаһыллыбыт 185 мөл. солк. сыаналаах оборудование туттуллубакка турара этиллэр. 2023 с. олунньутугар түөрт нефтебазаны тупсаран оҥорууга анаан кэлбит 1,2 млрд солк. кээмэйдээх федеральнай үп күн бүгүнүгэр диэри Казначейство счетугар хамсаабакка сытар. Маннык балаһыанньа баара олоҕу олорууга тыын суолталаах тэрилтэлэри уонна нэһилиэнньэни ньиэп бородууктатынан тохтоло суох хааччыйыыга уустуктары үөскэтэр кутталлааҕа сэрэхэдитэр.