Нэһилиэнньэни күөх төлөнүнэн хааччыйыы туһунан дьүүллэстилэр

Баһылык МАХ ханаалыгар иһитиннэрбитинэн, социальнай гаастааһын туһунан «Биир ньыгыл Арассыыйа» баартыйа норуодунай бырагыраамата Дьокуускайга 2021 сылтан саҕаланыаҕыттан үгүс үлэ ыытыллыбыт. Баартыйа көҕүлээһининэн уонна дойду Бэрэсидьиэнин өйөбүлүнэн киин куоракка 1,3 миллиард солкуобайтан тахса федеральнай үп тыырыллыбыт. 5700-тэн тахса дьиэ гаас ситимигэр холбонор кыахтаммыт. 4800-тэн тахса ыал гаас ситимин номнуо туһанан олорор. Аны туран, төһө да ситим тардыллыбытын үрдүнэн, 900-чэ дьиэҕэ билигин да гаас киирбэккэ турар. Онуоха, мэр этэринэн, хас да төрүөт баар, ону туоратыахха наада.

Дмитрий Садовников иһитиннэрбитинэн, РФ Энергетикаҕа министиэристибэтэ эрэгийиэннээҕи социальнай көмүскэл уорганнарыгар эбии үп көрүөхтээх. Оччоҕуна социальнай чэпчэтиинэн туһанар гражданнар дьиэлэрин иһигэр турба тардалларыгар уонна хочуол туруоралларыгар субсидия ылалларыгар көмө, тирэх буолуохтаах.  

Маны сэргэ, мунньах кыттааччылара «Теплоэнергия» АУо гааһы туһаныы иһин иэһигэр туспа тохтообуттар. Итиэннэ бу улахан суолталаах боппуруоһу быһаарар суоллары тобулбуттар.