Нэһилиэнньэни долгутар боппуруостары дьүүллэстилэр

Бэс ыйын 3 күнүгэр Олохтоох дьаһалтаҕа «Бүтүн Арассыыйатааҕы норуот фрона» Саха сиринээҕи салаатын салайааччыларын кытта оробуочай көрсүһүү буолан ааста. Манна куорат баһылыгын бастакы солбуйааччы Георгий Гаврильев, баһылык солбуйааччылара Владислав Слепцов, Антон Алексеенко, Владимир Дорожкин кыттыыны ыллылар.

Көрсүһүүгэ нэһилиэнньэни ордук долгутар боппуруостар – суол өрөмүөнэ, элбэх кыбартыыралаах дьиэлэри салайар хампаанньалар үлэлэрин, арыгынан эргиэни хонтуруолга ылыы, көҥүлэ суох сыбаалкалары кытта охсуһуу, улахан уйуктаах тырааныспар сырыытын бэрээдэктээһин уо.д.а. кыһалҕалар таарылыннылар.

Олохтоох дьаһалта өттүттэн Шавкунов уулуссатыгар былаан быһыытынан грейдер үлэлиэхтээҕэ бэлиэтэннэ, инникитин, чугастааҕы тиэргэннэргэ өрөмүөн ыытыллар түгэнигэр, суол кыра кэрчигэ аспаалланыан да сөбө этилиннэ. Маны таһынан Өктөөп 50 сыла уулуссаҕа сылаас гараастар турар сирдэригэр көҥүлэ суох сыбаалка баарын туһунан суһал иһитиннэрии киирдэ, үлэҕэ ылылынна.

Этиллибит кыһалҕалары уонна да атын кэккэ боппуруостары быһаарарга муниципальнай былаас уорганнарын кытта хардарыта үлэлиир туһунан ыллыктаах кэпсэтии ыытылынна.