Нэһилиэнньэҕэ аналлаах босхо туох дьарык Дьокуускайга баарый?

Сылдьыбыт тэрилтэлэрбитигэр биир ыйытыылаах тиийдибит: Нэһилиэнньэҕэ аналлаах босхо туох дьарык баарый?

Айаммыт куорат кытыытыттан Хатас нэһилиэгиттэн саҕаланна. Манна 7 №-дээх ДЮСШҕа сарсыарда 06.00 чаастан 08.00 чааска диэри ким баҕар кэлэн буор босхо саалаҕа, сүүрэр дорожкаҕа, сөбүлээбит тренажеругар дьарыктанар эбит. Ону таһынан дьыл хайа баҕар кэмигэр комплекс территориятыгар таһырдьа баҕалаахтар хаалыктаах хаамыынан дьарыктаналлар.

Салгыы «Звезднай” саҥа түөлбэҕэ үлэлиир 10 №-дээх ДЮСШ тиийэбит. Хомойуох иһин, биһиги ыйытыыбытыгар «нэһилиэнньэҕэ босхо дьарыктары ыыппаппыт” диэн быһа-бааччы хоруйдаатылар.

Куорат киинигэр турар "Чолбон" бассейнҥа эмиэ "суох" диэнтэн атыны истибэтибит. Бэлиэтээн этэр буоллахха, урукку сылларга сарсыарда 08.00 чааска диэри босхо сөтүө баарын элбэх киһи өйдүүр.

Салгыы "Дохсун" спорт комплексыгар айаннаатыбыт.

Манна нэһилиэнньэҕэ 06.00 чаастан 08.00 чааска диэри манежка ким баҕалаах босхо кэлэн сүүрэр усулуобуйата тэриллибит. Онтон атын чаастарга төлөбүрдээх дьарык арааһа элбэх.

Чөл олоҕу тарҕатыы нэдиэлэтигэр спорт комплекстар нэһилиэнньэ киэҥ араҥатыгар босхо дьарыктары тэрийэллэрэ буоллар спордунан уонна физическэй култууранан дьарыктанааччы уонна чөл олоххо үктэнээччи кэккэтэ лаппа кэҥиэ этэ диэн түмүккэ кэллибит.

Мантан сиэттэрэн Дьокуускай куорат физкультураҕа уонна спорка управлениетын салайааччыта Эдуард Васильевич Ефимовтыын сибээстэһэ сырыттыбыт.

– Эдуард Васильевич, чөл олоҕу тарҕатыы нэдиэлэтин чэрчитинэн нэһилиэнньэҕэ “Туох босхо дьарык баарый?” диэн боппуруоһунан спорт комплекстарыгар сырыттыбыт. Манна тугу эбэн тириэрдиэҥ этэй?

– Куорат олохтооҕо тыа сиригэр олорор киһитээҕэр хамсаныыта аҕыйах. Сарсыарда тахсан хаар да күрдьүбэт, эбэтэр хаһаайыстыбатын көрүнэн дуу, үлэтигэр сатыы тиийэн дуу хамсаммат буоллаҕа дии.

Куорат үрдүнэн оҕо спорт оскуолаларыгар билиҥҥи туругунан 8112 үөрэнээччи дьарыктанар. 2026-2027 сс. уон тыһыынчаҕа тиийиэҕэ. Евгений Николаевич мэринэн үлэлиэҕиттэн нэһилиэнньэҕэ аналлаах 70 тахса дьарыктанар былаһаакка тутулунн. Дьыл сылаас кэмигэр манна дьарыктанааччы олус элбэх буолар. Ону таһынан хаалыктаах хаамыынан даҕаны, көннөрү сатыы хаамар дьонтон саҕалаан сүүрэр дьоммут элбээтэ. 2022 сыллаахха 1000 киһи сүүрэр эбит буоллаҕына, билигин бу көрүҥҥэ дьарыктанар  киһи ахсаана 3000 тиийдэ. Аны тымныы ууга сөтүөлүүр дьоммут (моржалар) бастаан дьарыктаналларыгар 20 эбит буоллахтарына, билигин  200-тэн тахса буоллулар.  Оттон волейбол маассабай оонньуу көрүҥэр 200-тэн тахса хамаандаҕа 2000 тахса спортсмент дьарыктанар.

Киһи күрэхтэһиигэ эрэ кыттарга анаан дьарыктанар курдук өйдөбүл урут баар эбит буоллаҕына, билигин дьон эт-сиин бөҕөргүүрүгэр аһылыгар тиийэ көрүнэр буолла диэн бэлиэтии көрөбүн. Онон спорт комплекстарыгар эрэ буолбакка, пааркаҕа, уулуссаҕа, былаһааккаларга хаамар, сүүрэр, сөтүөлүүр, велосипедтыыр эдэр да, эмэн да дьон үгүс.

Эдуард Васильевич “Сарсыардаҥ туохтан саҕаланарый?” диэн ыйытыыга биэс мүнүүтэлээх сэрээккэттэн диэн хоруйдаата.