Нэһилиэнньэ ахсаана улаатан, дохуот үрдээһинэ бэлиэтэммит

2021 сылтан 2025 сылга диэри Дьокуускай куоракка урбаанньыттарга 300 мөлүйүөн солкуобай суумалаах 1 тыһыынча квота бэриллибит, маны таһынан кэтэх хаһаайыстыбаны тэринээччилэргэ 50 квотанан 9,5 мөлүйүөн солкуобай тыырыллыбыт.

Евгений Григорьев бэлиэтээбитинэн 2021 сылга киин куоракка 19 тыһыынча киһи орто уонна дьоҕус урбаанынан дьарыктаммыт буоллаҕына, 2025 сылга бу сыыппара 22 тыһыынчаҕа тиийэр туруктаах. Биирдиилээн атыы кээмэйэ эмиэ 155 млрд солкуобайтан 275 млрд солкуобайга тиийэрэ сабаҕаланар. Уопсастыбаннай аһылык эйгэтин дохуота эмиэ 2021 сылга 14 млрд солкуобайтан 2025 сылга икки төгүл улаатан, 28 млрд солкуобайга тэҥнэспит.

Ааспыт биэс сылга нэһилиэнньэ ахсаана эбиллэн, нэһилиэнньэ дохуота үрдээһинигэр тиэрдибит. Ол курдук, куорат бүддьүөтэ 22,1 млрд солкуобайтан 2025 сылга 35,6 млрд солкуобайга тиийбит. Оттон бүддьүөт ороскуоттаах чааһа 22,5 млрд солкуобайтан 37,09 млрд солкуобайга диэри улааппыт. Дохуот үрдээһинэ инфраструктураны сайыннарар уонна социальнай бырагыраамаларга үбүлээһини үрдэтэр кыаҕы биэрэр. Ол туһунан Олохтоох дьаһалта пресс-сулууспата иһитиннэрэр.