Нэһилиэктэргэ «Помним! Гордимся! Благодарим!» эстафета түмүктэнэн эрэр

Кыайыы 80 сылынан ыам ыйын 2 - 8 күннэригэр куорат кытыы нэһилиэктэригэр «Помним! Гордимся! Благодарим!» сүүрүү ыытылла турар. Албан ааттаах буойуннарга сүгүрүйүү бэлиэтэ эстафетаҕа куорат олохтоохторо көхтөөх кыттыыны ылаллар.
Сүүрүү бастакы түһүмэҕэ ыам ыйын 2 күнүгэр Кангалаастан уонна Тулагы Киллэмтэн саҕаламмыта. Манна 200-тэн тахса киһи, ол иһигэр биллиилээх спортсменнай кыттыыны ылбыттара. 
«Мы – наследники Великой Отечественной войны» Бүтүн Арассыыйатааҕы аахсыйа чэрчитинэн сүүрүү кэмигэр Кыайыы Знамятын биэрии ыытыллыбыта. Марха оскуолатын «Городской патруль» этэрээтин уонна куораттааҕы «Юнармия дьиэтин» иитиллээччилэриттэн турар знаменнай бөлөх Кыайыы Знамятын үөрүүлээх быһыыга-майгыга куорат нэһилиэктэрин дьаһалталарын салайааччыларыгар туттарбыта. 
Ыам ыйын 3 күнүгэр сүүрүү Марха уонна Маҕан нэһилиэктэригэр ыытыллыбыта. Манна холбоон 160 тахса киһи кыттыыны ылбыта. 
Бүгүн, ыам ыйын 4 күнүгэр, «Помним! Гордимся! Благодарим!» патриотическай эстафетаны Табаҕа, Хатас, Пригороднай олохтоохторо салҕыыллар. 
Түмүктүүр сүүрүү ыам ыйын 8 күнүгэр куорат киинигэр, Дьокуускай куорат Доҕордоһуу болуоссатыттан, саҕаланыаҕа. 
Бэлиэтээн эттэххэ, сүүрүүгэ ким баҕалаах забегпобеды.рф. саайтка регистрацияны ааһан кыттар кыахтаах. Дистанцияны ааспыттары өйдөбүнньүк мэтээл уонна футболка – дириҥ суолталаах тэрээһиҥҥэ кыттыыны ылбыты туоһулуур өйдөбүнньүк бэлэхтэр күүтэллэр. 
«Помним! Гордимся! Благодарим!» эстафета – ким да умнуллубатын, туох да умнуллубатын туоһута уонна Ийэ дойдуну көмүскээччилэргэ дириҥ сүгүрүйүү бэлиэтэ, диэн Олохтоох дьаһалта пресс-сулууспата иһитиннэрэр.