«Намыв» ыстаансыйаҕа көһүтэр пуун тутуллар
Атырдьах ыйын 29 күнүгэр «Намыв» ыстаансыйаҕа Саха Өрөспүүбүлүкэтин тырааныспарга уонна суол хаһаайыстыбатыгар миниистирин солбуйааччы Семен Коркин салайыытынан хонтуруоллуур-кэтээн көрөр уорганнар, Саха сиринээҕи «Госкомцен», «Саха сирин тимир суоллара» хампаанньа бэрэстэбиитэллэрэ уонна салгын олбохтоох суудунанан тиэйэр-таһар үлэлээх урбаанньыттар кыттыылаах көһө сылдьар сүбэ-мунньах ыытылынна.
Сүбэ-мунньах кыттыылаахтара дьыл кэмин быысаһыытыгар пассажирдары уонна таһаҕаһы салгын олбохтоох суудунанан тиэйиигэ туһаныллыахтаах тутулла турар көһүтэр пууну көрдүлэр. Эбийиэк тутуута түмүктэнэн эрэр. Бүгүҥҥү күн туругунан дьиэ каркааһа тутуллан, түннүктэрэ уонна ааннара туруоруллан, хамсаналларыгар хааччахтаах дьоҥҥо мэхэньиисимнээх пандуһу таҥыы үлэтэ бара турар. Пууну балаҕан ыйын бүтүүтэ туттарар былааннаахтар.
Маны таһынан сүбэ-мунньахха тырааныспарга куттал суох буолуутун уонна террористическай кутталтан көмүскэллээх буолуу боппуруостарын ырыттылар. Бу көрсүһүү түмүгэр эбийиэги бас билээччи «Саха сирин тимир суоллара» хампаанньаҕа уонна тиэйэччилэргэ инфраструктура уонна суудуна эбийиэктэригэр харыстабыл таһымын үрдэтэргэ эттилэр.
Хаартыска: ГТРК "Саха" саайтан.
Сонуннар
Ордук ааҕаллар
