Наҕараада дьоруойдарын аҕыс сыл буолан баран булла

Оттон кинилэр дьоруойдуу быһыылара биир дойдулаахтарын көмөтүнэн биллибит.

Ол сыл балаҕан ыйын саҥатыгар Иннокентий, Елизавета Егоровтар кордоҥҥа кыстыкка бэлэмнэнэ сылдьыбыттар. Көмө көрдөһөр хаһыыны истэн, эр киһи үрдүк сиргэ тахсан, ууга оҥочото суох дьону көрбүт. Иннокентий суһаллык мотуорун собуоттуу охсоот, Алдан өрүскэ иккитэ кырынан, алта киһини барыларын таһаарбыт, онтон үһэ быыһыыр сэлиэччигэ суох эбит. Кэлин биллибитинэн, оҥочолоро мэһэйгэ түбэспит, ол кэнниттэн мотуордара ууга түспүт. Быыһааччылар тымныы уу уонна Алдан өрүс күүстээх сүүрүгэ ууга былдьаммыт дьоҥҥо туох да кыаҕы хаалларыа суох этэ диэн бэлиэтээбиттэр.

Быыһаммыт эр дьон билигин дьиэ кэргэн тэринэн быр-бааччы олороллор, оттон Егоровтар бочуоттаах сынньалаҥҥа тахсыбыттар. Наҕараада дьоруойдары буларыгар нэһилиэктэрин олохтооҕо, урбаанньыт Валерий Шадрин көмөтө кырата суох. Иннокентий «За заслуги в деле спасения», кэргэнэ «Гражданская инициатива» бэлиэлэри ыллылар. Ону тэҥэ Валерий Шадрин дьиэ кэргэҥҥэ «Рысь» вездеход атыылаһалларыгар 500 000 солкуобайдаах сэртипикээти туттарда. Дьоруой бэйэтэ кини оҥорбут быһыытын ураты дии санаабат, кини оннугар ким баҕарар оннук гыныа этэ диир.

Хаартыска: Саха сиринээҕи быыһыыр сулууспа