Өҥөнү оҥоруу хаачыстыбата үрдүөхтээх

Аҕыйах хонуктааҕыта «ЯПАК» МУТ балансовай хамыыһыйата ыытылынна. Мунньах кыттыылаахтара тэрилтэ үлэтин түмүгүн, инники сайдар былаанын дьүүллэстилэр.

Бэлиэтээн эттэххэ, «ЯПАК» тэрилтэ оптуобустара куорат таһынааҕы нэһилиэнньэлээх пууннарга, Хаҥаласка, Горнайга, Намҥа уонна Чурапчыга пассажирдары тиэйэллэр. Ону сэргэ, куорат иһигэр 1, 11 уонна 100 №-дээх маршруттарга үлэлииллэр.

Баһылык Евгений Григорьев иһитиннэрбитинэн, күннэтэ линияҕа 55 кэриҥэ оптуобус тахсар, тэрилтэ 150 курдук үлэһиттээх.

Балансовай хамыыһыйа иитинэн ыытыллыбыт бэрэбиэркэ түмүгүнэн тэрилтэ үлэтэ үтүө түмүктээх буоларыгар, ороскуот аччыырыгар, нэһилиэнньэҕэ өҥөнү оҥоруу хаачыстыбата үрдүүрүгэр кэккэ быһаарыылар ылылыннылар. Манна даҕатан эттэххэ, тиһиктээх үлэ түмүгэр «ЯПАК» МУТ аныгылыы оптуобуһунан хааччыллыбытын, 2022 сылтан 90 саҥа тиэхиньикэлэммитин бэлиэтээн ааһар тоҕоостоох.

Хамыыһыйа саҥа автомойканы үлэлэтэн көрдө. Этэҥҥэ үлэлээн саҕалаатаҕына, оптуобустар өрүү ыраас буолалларын ситиһэргэ эрэл улааппыта бэлиэтэннэ. Манна сыһыаран эттэххэ, «ЯПАК» МУТ оптуобустара күн аайы линияҕа тахсыахтарын иннинэ бэрэбиэркэни ааһаллар, симиэнэ кэнниттэн территорияҕа суунан баран ыраас киирэллэрэ ирдэниллэр. 

Инникитин «СоюзАвто» чааһынай тиэйээччилэргэ ирдэбил кытаатыаҕа. Евгений Григорьев этэринэн, оҥоһуллар өҥө маршруттан уонна тиэйээччиттэн тутулуктаныа суохтаах.