Музыка Үрдүкү оскуолатын тутууну түмүктүүргэ федеральнай бүддьүөттэн 1,5 млрд солк. ыытыахтара

Дойду баһылыга Владимир Путин сорудаҕынан федеральнай бүддьүөттэн Дьокуускайга тутуллар В.А. Босиков аатынан Музыка үрдүкү оскуолатын тутууну түмүктүүргэ эбии үп тыырыллыаҕа, диэн иһитиннэрэр Ил Дархан Айсен Николаев. 

Дойду баһылыга Владимир Путин сорудаҕынан тутуу 2026 сылга түмүктэниэхтээх. Онуоха федеральнай бүддьүөттэн 2025 сылга  – 663,138 мөл. солк., 2026 сылга – 872,603 мөл. солк. Тыырыллар буолбут.
Санатар буолахха, 2024 сыл бэс ыйын 18 күнүгэр Владимир Путин Дьокуускай куоракка сырыытын түмүгүнэн Арассыыйа Бырабыыталыстыбатыгар 2024-2026 сылларга федеральнай бүддьүөттэн Музыка үрдүкү оскуолатын саҥа корпуһун тутууну түмүктүүргэ, ол иһигэр 2025 сылга музыкальнай инструменнары атыылаһарга харчы көрөргө сорудахтаабыта. 

Музыка үрдүкү оскуолатын иккис уочаратын тутуу быйыл Өрөспүүбүлүкэ күнүгэр, муус устар 27 күнүгэр, саҕаламмыта. 2024 сылга былааннаммыт 122 сыбаайа туруоруллубута.
Оскуола саҥа дьиэтин бастакы сыбаайатын ууруу үөрүүлээх түгэнигэр Ил Дархан Айсен Николаев дойду баһылыга Владимир Владимирович Путин 1999 сыллаахха Саха сиригэр кэлэ сылдьан Музыка үрдүкү оскуолатыгар ыалдьыттаабытын, оҕолор классическай музыка айымньыларын толорбуттарын истиҥник ахтарын бэлиэтээбитэ. Оскуола үс мэндиэмэннээх саҥа дьиэтин уопсай иэнэ 9,5 тыһ. кв миэтэрэ, манна 240 миэстэлээх үөрэнэр корпус уонна 150 миэстэлээх интэринээт киирэллэр. Итини сэргэ кэнсиэртиир саала, библиотека, устуудьуйа, фонотека кабинеттара, спорт саалата баар буолуохтара, диэн иһитиннэрэр Ил Дархан уонна Бырабыыталыстыба пресс-сулууспата. 
Музыка үрдүкү оскуолата Саха сиригэр 1993 сыллаахха Бастакы Бэрэсидьиэн Михаил Ефимович Николаев көҕүлээһининэн тэриллибитэ. Манна бүгүн 7-тэн 18-гар диэри саастаах 174 оҕо уопсай уонна орто анал, 103 устудьуон үрдүк үөрэххэ үөрэнэллэр.