Муус устар 21 күнэ – Олохтоох бэйэни салайыныы күнэ

Муус устар 21 күнүгэр Арасыыйаҕа бэлиэтэнэр Олохтоох бэйэни салайыныы күнүнэн Дьокуускай куорат дьаһалтатыгар олохтоох бэйэни салайыныы уорганнарын бастыҥнарын чиэстээтилэр.

Бу үөрүүлээх күнүнэн Дьокуускай куорат баһылыга Евгений Григорьев: «Барыбытын идэлээх бырааһынньыкпытынан эҕэрдэлиибин! Дьокуускай куорат Арассыыйа Уһук Илиҥҥи эргимтэтигэр биир тэтимнээх сайдыылаах куоратынан биллэр. Биһиги айылҕа тыйыс усулуобуйатыгар турар куоракка олоробут, онон олох, кэм-кэрдии  туруорар кыһалҕаларын эһигини кытта бииргэ быһаарарбытынан киэн туттабын. Ситиһиибит аҕыйаҕа суох, ол эрээри быһаарыыны эрэйэр боппуруос эмиэ аҕыйаҕа суох. Тапталлаах куораппытын бары бииргэ, биир санаанан сайыннарыахха, тупсарыахха!» – диэн бэйэтин эҕэрдэтин уонна баҕа санаатын эттэ.
Куорат дууматын бэрэссэдээтэлэ Альберт Семенов бэйэтин эҕэрдэтигэр Олохтоох бэйэни салайыныы күнэ олорор, үлэлиир куоратын туһугар ис сүрэҕиттэн кыһаллар дьон бырааһынньыга буоларын бэлиэтээтэ уонна олохтоох бэйэни салайыныы былаас уонна нэһилиэнньэ икки ардыларынааҕы диалог түмүгэр үөскүүр модун күүс буоларын, куораты сайыннарыыга, тупсарыыга саамай сөптөөх, кырдьыктаах этиилэр, көҕүлээһиннэр уокуруктарга, түөлбэлэргэ үөскүүллэрин бэлиэтээтэ.
Бу күн өр сыллаах уонна ситиһиилээх үлэлээх исписэлиистэргэ наҕараадалары туттардылар уонна идэҕэ күрэхтэр кыайыылаахтарын ааттаатылар. 
Ол курдук, «Бастыҥ муниципальнай сулууспалаах» күрэх кыайыылааҕын аатын сүктүлэр: I истиэпэннээх диплом – Оксана Максимова; II истиэпэннээх диплом – Ксения Чота уонна Елена Новикова; III истиэпэннээх диплом – Лариса Ефремова уонна Туйара Мигалкина. Уокуруктар управаларын бастыҥ үлэһиттэринэн туһааннааҕынан Михаил Иванов, Николай Николаев, Василена Скрябина уонна Ольга Дорофеева ааттаннылар. Оттон куорат таһынааҕы нэһилиэк дьаһалтатын бастыҥ үлэһиттэрин аатын Любовь Баишева, Татьяна Горохова, Майя Горохова уонна Наталья Игнатьева сүктүлэр, диэн иһитиннэрэр Олохтоох дьаһалта пресс-сулууспата.