«МУУС УСТАР-2025» талисманын оҥорууга күрэх биллэрилиннэ

Кулун тутар 17-22 күннэригэр буолаары турар V-c өрөспүүбүлүкэтээҕи «Муус устар» ыччат бэстибээлин тэрийээччилэр бэстибээл талисманын оҥорууга айар күрэҕи биллэрдилэр.
Үлэлэри олунньу 20 күнүгэр диэри talisman.muusustar@mail.ru электроннай почтаҕа «Талисман» диэн бэлиэлээх күүтэллэр.
Күрэх усулуобуйатынан, талисман «МУУС УСТАР» тэрээһиҥҥэ, ыччат бырааһынньыгар, сааска уонна Саха сиригэр сыһыаннаах буолуохтаах. Кыттааччылар персонаж (уруһуй, эскиз) аатын ыйаллара, бэйэлэрин идеяларын билиһиннэллэрэ биһирэнэр. 
Дьүүллүүр сүбэ 5 бастыҥ үлэттэн биир эбэтэр икки кыайыылааҕы талар, диэн https://www.sakha.gov.ru/news/front/view/id/3482644 иһитиннэрэр. 
Санатар буоллахха, быйылгы үбүлүөйдээх бэстибээл 24 куонкуруһун балаһыанньата бигэргэнэн турар. Ол курдук, быйылгы бэстибээл 12 хайысханан үлэлиэҕэ: «Воплощай и вдохновляй», «Якутия – твоя сила духа», «Перспектива в познании», «Вперед к победам!», «Медиа-будущее: расскажи о важном!», «Развивайся в Якутии!», «Добываем будущее вместе!», «Созидай и создавай!», «Твори добро!», «ЭТнО-МЫ!», «Россия – страна возможностей!», «Защитник Родины!».
СӨ Бырабыыталыстыбатын бэрэссэдээтэлин солбуйааччы Ольга Балабкина бэлиэтээбитинэн, Аҕа дойду Улуу сэриитигэр Кыайыы 80 сылын көрсө Арассыыйаҕа биллэриллибит Аҕа дойдуну, Саха сиригэр Ийэ дойдуну көмүскээччи сылларын чэрчитинэн быйылгы бэстибээлгэ дойдунаат (патриотизм) тиэмэтэ күүһүрдүллэн биэрбит. Ол курдук, “Защитник Родины” диэн саҥа хайысха эбиллибит. Бу хайысхаҕа ыччат хамаандаларын дронунан күрэхтэһиилэрэ, ону тэҥэ байыаннай бэлэмнээх буолууга уонна патриоттуу иитиигэ куонкурустар ыытыллыахтара.
Маны таһынан бэстибээл «Якутия – твоя сила духа» диэн саҥа хайысхатыгар «Туристический код моего района» куонкурус, «Чистая Арктика» федеральнай экологическай бырайыак сессията уонна саха төрүт аһын ааттаппыт Иннокентий Тарбахов 80 сааһыгар анаммыт «Секреты шефа» асчыттар күөн күрэстэрэ буолуохтара.
Оттон «Развивайся в Якутии» хайысхаҕа уһуйааччылар куонкурустара, “Молодой аграрий” интеллектуальнай оонньуу, Аҕа дойду Улуу сэриитигэр Кыайыы 80 сылын көрсө “Креасфера+” сыыппара худуоһунньуктарын куонкуруһа ыытыллыахтара.
Быйылгы ыччат бэстибээлин өссө биир саҥа хайысхатынан “Россия – страна возможностей” платформа бырайыагын кыайыылаахтарын уонна кыттыылаахтарын слета буолуо.
Бу 5-с сылын өрөспүүбүлүкэ бырабыыталыстыбатын тэрээһининэн үрдүк таһымҥа ыытыллар бэстибээл сүрүн соругунан өрөспүүбүлүкэ эдэр талааннарын арыйыы, өйөөһүн уонна араас эйгэҕэ кыахтарын олоххо киллэрэллэригэр көмөлөһүү буолар.
Бэстибээлин түмүктүүр дьоро тэрээһин кулун тутар 22 күнүгэр «Өрөгөй» спорт уораҕайыгар ыытыллыаҕа.