«Муус Устар-2025» — төрөөбүт дойдуга таптал

Кулун тутар 17-22 күннэригэр сылын аайы тэриллэр өрөспүүбүлүкэтээҕи «Муус Устар» ыччат бэстибээлэ быйыл үбүлүөйдээх 5-с төгүлүн ыытыллыа. Бу тыһыыначанан кыттааччыны сомоҕолообут ыччат бэстибээлигэр кыттаары, өрөспүүбүлүкэбит араас улууһун хамаандалара, тэрийээччилэр ыстааптара, экспердэр, ону тэҥэ волонтердар, атын да тустаах тэрилтэ бэрэстэбиитэллэрэ номнуо бэлэмнэнэ сылдьаллар.  

Бэстибээл ханнык хайысхаларынан барара, ыытыллыахтаах 24 куонкурус балаһыанньалара бэлиэр бигэргэнэн тураллар. Ол курдук, быйылгы бэстибээл 12 хайысханан үлэлиэҕэ: «Воплощай и вдохновляй», «Якутия – твоя сила духа», «Перспектива в познании», «Вперед к победам!», «Медиа-будущее: расскажи о важном!», «Развивайся в Якутии!», «Добываем будущее вместе!», «Созидай и создавай!», «Твори добро!», «ЭТнО-МЫ!», «Россия – страна возможностей!», «Защитник Родины!».

Билиҥҥитэ улуустар номнуо кыттааччыларын сүүмэрдээн эрэллэр, күүстээх бэлэмнэниилэр буолаллар. 

СӨ Бырабыыталыстыбатын бэрэссэдээтэлин солбуйааччы Ольга Балабкина бэлиэтээбитинэн, Аҕа дойду Улуу сэриитигэр Кыайыы 80 сылын көрсө Арассыыйаҕа биллэриллибит Аҕа дойдуну, Саха сиригэр Ийэ дойдуну көмүскээччи сылларын чэрчитинэн быйылгы бэстибээлгэ дойдунаат (патриотизм) тиэмэтэ күүһүрдүллэн биэрбит. Ол курдук, “Защитник Родины” диэн саҥа хайысха эбиллибит. Бу хайысхаҕа ыччат хамаандаларын дронунан күрэхтэһиилэрэ, ону тэҥэ байыаннай бэлэмнээх буолууга уонна патриоттуу иитиигэ куонкурустар ыытыллыахтара.

Маны таһынан бэстибээл «Якутия – твоя сила духа» диэн саҥа хайысхатыгар «Туристический код моего района» куонкурус, «Чистая Арктика» федеральнай экологическай бырайыак сессията уонна саха төрүт аһын ааттаппыт Иннокентий Тарбахов 80 сааһыгар анаммыт «Секреты шефа» асчыттар күөн күрэстэрэ буолуохтара.

Оттон «Развивайся в Якутии» хайысхаҕа уһуйааччылар куонкурустара, “Молодой аграрий” интеллектуальнай оонньуу, Аҕа дойду Улуу сэриитигэр Кыайыы 80 сылын көрсө “Креасфера+” сыыппара худуоһунньуктарын куонкуруһа ыытыллыахтара.

Быйылгы ыччат бэстибээлин өссө биир саҥа хайысхатынан “Россия – страна возможностей” платформа бырайыагын кыайыылаахтарын уонна кыттыылаахтарын слета буолуо.

Бу 5-с сылын өрөспүүбүлүкэ бырабыыталыстыбатын тэрээһининэн үрдүк таһымҥа ыытыллар бэстибээл сүрүн соругунан өрөспүүбүлүкэ эдэр талааннарын арыйыы, өйөөһүн уонна араас эйгэҕэ кыахтарын олоххо киллэрэллэригэр көмөлөһүү буолар.

Быйылгы «Муус Устар» ыччат бэстибээлин түмүктүүр дьоро тэрээһин кулун тутар 22 күнүгэр «Өрөгөй» спорт уораҕайыгар ыытыллыаҕа.