«Муус устар-2025» бэстибээл талисмана — Кэскил

Кулун тутар 17-22 күннэригэр буолаары турар V-c өрөспүүбүлүкэтээҕи «Муус устар» ыччат бэстибээлин тэрийээччилэр бэстибээл талисманын оҥорууга айар күрэҕи биллэрбиттэрэ.

Талисман «МУУС УСТАР» бэстибээлгэ, ыччат бырааһынньыгар, сааскы кэмҥэ уонна Саха сиригэр сыһыаннаах буолуохтаах диэн куонкурус усулуобуйатыгар ыйыллыбыта.

Дьүүллүүр сүбэ кэлбит үлэлэртэн 5 бастыҥы талан социальнай ситимнэринэн куоластааһыны ыыппытыгар уопсайа 8,6 тыһыынча киһи кытынна. Куоластааһын тухары икки үлэ, тилэх баттаһа аҕыйах куолаһынан быысаһан, инники күөҥҥэ таҕыстылар. Куонкурус түмүктэнэн дьүүллүүр сүбэ икки кыайыылааҕы ааттаата.

Ол курдук, 3176 куолаһы ылан «Кэскил» 1-кы, «Ньургуһуннар» 2-с миэстэҕэ тахсаннар, кыайыылаах аатын сүктүлэр. Тэрийээччилэр кыттыбыт дьоҥҥо махтаналларын этэллэр.

Бүгүн биһиги талисманы оҥоруу куонкуруһун кыайыылааҕа, «Муус устар-2025» бэстибээл анал бэлиэтин ааптара Виктория Дьячковскаяны кытта кэпсэтэбит.

– Виктория, бэйэҕин билиһиннэр эрэ.

– Мин Амма улууһун Алтан нэһилиэгиттэн сылдьабын. «Айар Уустар» креативнай индустрия колледжыгар графическай дизайн хайысхатыгар иккис кууруска үөрэнэбин.

– Тоҕо ала чуо бу идэни талбыккыный?

– Олох оҕо эрдэхпиттэн уруһуйдуурбун олус сөбүлүүбүн. Оттон 2021 сылтан графическай уруһуйдааһыны сэҥээрбитим. Ол иһин графическай дизайнер идэтигэр туттарсарга быһаарыммытым.

– Бу өрөспүүбүлүкэтээҕи ыччат бэстибээлигэр талисман оҥоруу куонкуруһа ыытылларын туһунан хантан билбиккиний?

– Бу манна преподавателлэрбэр махтанабын. Куратордарбыт бу куонкуруска хайаан да кыттаҕыт диэн биһиэхэ сорудах биэрбиттэрэ.

– Дьэ, билигин персонаһыҥ туһунан кэпсэтиэххэ. Кэскил, кини кимий, хайдах айыллан тахсыбытай?

– Кэскил талисманы оҥоруубар бэстибээл аата улахан оруолу ылбыта, «муус устар» диэнтэн иэйиилэнэн тахсыбыт персонаж. Бастакытынан, «муус устар» диэн ый баар; иккиһинэн,  муус ууллуута. Муус устар ыйга өрүспүт мууһа ууллан барар, улахан дьапталҕа муус көөрөттөн, кыракый муус бытархайдара үөскүүллэр. Ону көрдөрөргө кыһаллыбытым. Талисман аатын туһунан кэпсиир буоллахха, Кэскил – сайдар-үүнэр кыахтаах, үрдүкү чыпчаалларга, сайдыыга дьулуһуу. Бу ааты талыым «Муус Устар» бэстибээл кыттыылаахтара өрүү үрдүккэ буоллуннар, сайда турдуннар диэни кытта ситимнээх. Персонажпын Adobe illustrator бырагырааманан оҥорбутум.

– Маннык үрдүк таһымнаах, элбэх кыттааччылаах куонкуруска кыайыы – улахан ситиһии. Кыайыам диэн эрэл баара дуо?

– Кыайбыппын истэн олус үөрбүтүм. Бу миэхэ улахан ситиһии буолар. Кырдьыгынан  эттэххэ, кыайыам диэн санаабат да этим.

– Кыайыылааҕы быһаарар куоластааһыҥҥа иккис тахсыбыт «Ньургуһуннары» кытта эриэ-дэхси тилэх баттаһа испиккит. Төһө долгуйбуккунуй?

– Долгуйуу, биллэн турар, баара. Ол эрээри аҥаардас финалга киирбитим да миэхэ улахан үөрүү этэ. Миэхэ куоластаабыт, өйөөбүт дьоҥҥо барҕа махталбын этэбин. Ону тэҥэ махтал буоллун көмөлөспүт, миэхэ эрэммит чугас, аймах дьоммор!

– Бэстибээл финалын үөрүүлээх тэрээһинигэр билиэттэргитин туттугут дуо?

– Тэрийээччилэр эрдэ эппиттэрин курдук, финалга киирбит биэс кыттааччы бу үөрүүлээх тэрээһиҥҥэ билиэттэри тутуохтаахпыт. Контактарбытын ылбыттара, бу күннэргэ ситимнэһиэхтэрэ диэн күүтэбит.

– Кэлэр кэми оҥорон көрүөх, аны биэс сылынан бэйэҕин хайдах көрөҕүн?

– Аны биэс сылынан сөбүлүүр идэбинэн, таптыыр үлэбин булан айымньылаахтык үлэлии сылдьар буолуом диэн баҕа санаалаахпын.

– Виктория, махтал буоллун санааҕын үллэстэн кэпсэппиккэр, үөрэххэр, айар үлэҕэ ситиһиилэри!

***

Санатар буоллахха, «Муус устар-2025» өрөспүүбүлүкэтээҕи ыччат бэстибээлин финала кулун тутар 17-22 күннэригэр Дьокуускай куоракка ыытыллыа. Быйылгы бэстибээл Саха сирин араас муннугуттан барыта 25 тыһыынчаттан тахса ыччаты түмэрэ күүтүллэр. Билигин хас улуус аайы бэстибээл хайысхаларынан сүүмэрдиир куонкурустар ыытылланнар, номнуо түмүктэрин таһааран эрэллэр. Оттон киин куораппыт Кэскил талисманнаах «Муус Устар-2025» ыччат өрөспүүбүлүкэтээҕи бэстибээлин кыттыылаахтарын кулун тутар 17 күнүгэр көрсүө.

Хаартыскалар:
Дьоруой тус архыыбыттан уонна «Муус-устар» тг-ханаалтан