Муус оҥоһук күрэһигэр быйыл 20 хамаанда кыттар

Саха сирин худуоһунньуктарын кытта куонкуруска Арассыыйа араас куораттарыттан, дойду тас өттүттэн тиийэ кэлэн кыттар буолбуттара. «Саха сирин бирилийээннэрэ» куонкурус быйыл Дьокуускайга сэтинньи 24–30 күннэригэр буолар. Онно кыттаары 20 хамаанда ох курдук оҥосто сылдьар.

Ол иһигэр, ыраахтартан саҕалаатахха, Кытайтан – икки, Монголияттан – 1 хамаанда, Перуттан бэрэстэбиитэл, Санкт-Петербургтан – икки, Хабаровскай кыраайтан – икки хамаанда уонна РФ биир хомуур хамаандата анаан-минээн кэлбит.

Тааттаттан (Василий Назаров, Афанасий Варфоломеев), Ньурба Өҥөлдьөтүттэн (Герасим, Дмитрий Максимовтар), Хаҥаластан (Аркадий Сивцев, Егор Захаров) бааллар.

Ону таһынан улуустар бэрэстэбиитэллэрэ хомуур хамаанда тэринэн кытталлар эбит: Архип Скрябин (Мэҥэ Хаҥалас) уонна Геннадий Омонов (Уус Алдан), Максим Капитонов (Бүлүү) уонна Станислав Сыромятников (Анаабыр), Николай Ушницкай (Уус Алдан), Айаал Никитин (Дьокуускай), Валерий Стручков (Мэҥэ Хаҥалас), Василий Васильев (Үөһээ Бүлүү).

Биир сонун көстүү – Норуоттар икки ардыларынааҕы таһымнаах «Доҕордоһуу» хамаанда кытта баар. Ол – Хосе (Перу) уонна Леонид Афанасьев (Саха сирэ) хамаандалара.

 Хатастан Максим Охлопков, Айсен Габышев хамаандалара кыттар.

Биллэн турар, Дьокуускайтан эмиэ бааллар. Куораппыт чиэһин быйыл үс хамаанда көмүскүүргэ турунна. Кэрэхсэбиллээҕэ, кинилэр ортолоругар «Ситим» кэрэ аҥаардар хамаандалара (Александра Неустроева, Людмила Федорова) баар. Кинилэр соҕотох буолбатахтар. Ону сэргэ өрөспүүбүлүкэ хомуур хамаандатын быһыытынан Анна Саввина (Дьокуускай), Мария Шадринова (Мэҥэ Хаҥалас) туһунан киирсиэхтэрэ.