Мобильнай сибээһи ФСБ модьуйуутунан араарыахтарын сөп

Маныаха абоненнар быстах кэмҥэ өҥө тохтообутун туһунан үҥсэр кыахтара суох буолуоҕа.

“Сибээс туһунан” сокуоҥҥа уларытыылар киириэхтэрэ, оператордары өҥөнү тохтотуу иһин эппиэтинэстэн босхолуохтара. Ону таһынан, сибээс сорох түбэлтэҕэ арахсыаҕа, чопчу испииһэги бырабыыталыстыба быһаарыаҕа.

Цифровой сайдыы миниистирин солбуйааччы Иван Лебедев этэринэн, бүтүннүү тохтотуу анал быраабыла быһыытынан ыытыллыаҕа. Ол гынан баран бу быраабылалар кистэлэҥҥэ тутуллаллар.

“Тугу уонна төһө кээмэйдээх арааралларын туһунан нуорма аакталара баар буолуохтара. Ону өстөөхтөр  билбэттэрин туһугар, кистиэхтэрэа. Бу ФСБ көрдөһүүтүгэр олоҕурар”, - диэн Лебедев быһаарда.

Сокуоҥҥа РФ Бэрэсидьиэнэ Владимир Путин илии баттаатаҕына, бэчээккэ тахсыбытын кэннэ 10 күнүнэн күүһүгэр киирэр.