МИССИС ЛИГА -2025: киин куорат талба талааннарын күрэҕэ

Үөһэ үрдүк мэҥэ халлааҥҥа олохтоох, үс дойду оргуйар олоҕун үүнүн-тэһиинин тутан олорор Үрүҥ Айыы Тойон сардаҥалаах санаата сайбытын хоту, урааҥхай саха кутун туппут, дойду дойдуга дьоһун сураҕырбыт, Сайсары Эбэ ытык сиригэр-уотугар ураты тыыннаах кэрэ тэрээһин сэтинньи ый 29 күнүгэр ыытыллан, дьону-сэргэни түмэ тарта.

Бүтүн дойдуга Ийэ күнүн көрсө, Сайсаар уокуругар саҥа тутуллубут Саха политехническэй лицей үөрэҕин кыһатыгар Дьокуускай куорат араас уокуруктарын туллар тутааҕа, тирэнэр тирэҕэ буолбут далбар хотуттара, араас идэлээх кэрэ аҥаардар «Миссис Лига – 2025» диэн кэрэ көстүү, талба талаан күрэҕэр кытыннылар.

Тэрээһини былырыыҥҥы “Миссис Лига – 2024” күрэх кыайыылааҕа Ульяна Скрябина торумнаан, сценарийын суруйан, режиссердаан туруорда.  Ытык сиргэ ыытыллар тэрээһини Умсулҕан Хотун өбүгэ саҕаттан кэлбит сиэри-туому тутуһан, толомон кэрэ ньуурдаах, Тунал Хотуттарынаан долгулдьуһан тахсан, төлкө түстэһэн ыллам ыллыгы ыйсан, сиэри ситиһэн, туому тутуһан алгыһынан арыйда.

​Бу кэрэ сэбэрэ, мааны мөссүөн, талба талаан күрэҕэр кэрэни-сырдыгы сыаналааччылар, сүгүрүйээччилэр, күрэххэ кыттар кэрэ куолары кытта тэбис-тэҥҥэ, ис сүрэхтэриттэн долгуйууларын, үтүмэн үөрүүлэрин үллэстэн,  үлүмнэһэ олордулар. Тэрээһини Сайсары уокуругун дьахталларын сэбиэтэ  (сал. Угапьева М.В.), Сайсары уокуругун дьаһалтатын салалтата (сал. Тастыгин П.П.) уонна «Дьокуускай куорат дьахталларын лиигэтин» тэрилтэ (сал. Егорова Т.Д) иилээн-саҕалаан тэрийдилэр.

​Саас сааһынан кэпсээтэххэ субу курдук.  Дьокуускай куорат уокуруктарыттан, куорат таһынааҕы нэһилиэктэртэн лоп курдук 10 кэрэ аҥар, дьиэ кэргэн маанылаах  — Далбар Хотуттара толуу көрүҥнээх холоонноох доҕотторунаан, күҥҥэ көрбүт күндү көмүстэринээн  маанылаах таҥаһы сайбаччы кэтэн,  сэгэччи үктэнэн,  үрдүк сыанаҕа хааман наскылдьыһан киирэннэр,  бэйэлэрин билиһиннэрдилэр.  Кэрэ куолар хас биирдиилэрэ ураты талаан, кэрэ көстүү үтүө холобура буолан, дьүүллүүр сүбэ, бар дьон иннигэр күрэх хас биирдии түһүмэҕин аайы илин-кэлин түсүһэн, бииртэн биир талба талааннарын, мындыр өйдөрүн, сатабылларын, араас эйгэҕэ ситиһиилэрин ситэрэн -хоторон сиһилии кэпсээтилэр, экран нөҥүө көрдөрдүлэр.

Хас биирдии кыттааччы уустаан-ураннаан бэйэтин, дьиэ кэргэнин билиһиннэриитин, бу олоххо ситиһиитин, Дьокуускай куораппыт сайдыытыгар актыыбынай кыттыыны ылалларын, араас социальнай тэрээһиннэргэ, уопсастыбаннай хамсааһыннарга, бырайыактарга кытталларын көрөөччүлэр сэргии иһиттилэр.  Талба талаан күрэҕэр ыллам ырыабыт ыпсаҕайа, доллоһутар олоҥхобут дорҕооно, дьүрүһүйэр хомуспут дьүрүскэнэ, хомоҕой тыллаах хоһооммут абылаҥа, сэргэх сэһэммит сэксэҥнэтэр күүһэ, добун тыллаах оһуохайбыт умсулҕана бука барыта толоруллан, дьон-сэргэ кутун туттулар.  Бу түһүмэххэ тарбахтарыгар талааннаахтар араас оҥоһуктара, кыра оҕо кэтэр таҥаһын коллекцията, ону тэҥэ күндү түүлээхтэн тигиллибит  мааныга кэтиллэр эксклюзивнай таҥас коллекцията, кэрэ тэрээһини ситэри симээн, толору киэргэтэн биэрдилэр.

Ас, бүлүүдэ астаан кэлэр түһүмэххэ бары хаһаайкалар сөҕүмэр элбэх араас аһы бэлэмнээн, өбүгэ төрүт аһын астаан, киэргэтэн дьиэ кэргэҥҥэ, оҕоҕо таптал, истиҥ сыһыан эйгэтин үөскэттилэр. Өркөн өй күрэҕин түһүмэҕэр хас биирдии кыттааччы тэрээһин үбүлээччилэрэ «Твоя мода», «Vassa» таҥас маҕаһыыннарын дьыалабыай таҥастарын көрдөрдүлэр, хас биирдиилэрэ история, култуура, уопсастыбаннай хамсааһыннарга дьахтар оруолун туһунан  ыйытыкка иҥнибэккэ хоруйдаатылар. Түмүктүүр түһүмэххэ, дьэ уонна сүрэҕи манньыта, дууһаны үөрдэ буоларын курдук, кыттааччылар мааны киэһээҥҥи былааччыйалаах,  эмдэй – сэмдэй кыра уолаттарыттан кыһыл роза сибэкки дьөрбөтүн бэлэх тутан,   арыаллатан киирэннэр, мааны мөссүөн, кэрэ сэбэрэ, ийэ киһи, кэрэ аҥар уобараһын толору арыйдылар, дьону-сэргэни долгуттулар. Ийэ тапталынан удьуор утума салҕанарын, ийэ киһи сылаас холумтана дьиэ кэргэни түмэрин итэҕэйдилэр. Киһи «сык» гына түһэр толуу-мааны далбар хотуттар долгулдьуһа  хаамсалларын көрөн  бука бары да долгуйдубут. 

Бу дьоһун мааны киэһэҕэ айылҕаттан айдарыылаах, талыы-талба талааннаах ырыаһыттарбыт FLOW, Карина Попова, Арина Протопопова ырыаны-тойугу, үҥкүүнү-битиини бэлэхтээн саала иһэ дохсун ытыс тыаһынан доҕуһуолланна. Хас биирдии ырыа дириҥ ис хоһоонноох, истиҥ иэйиилээх буолан көрөөччүгэ тиийимтиэ буолла. Айастаан Боронов скрипкаҕа оонньуута киһини барытын долгутта, хатыламмат кэрэ эйгэни  үөскэттэ. Саха Өрөспүүбүлүкэтин култууратын үтүөлээх үлэһитэ Мария Александрова салайар «Нууралдьыйа» уонна «КэрэКэм» ырыа бөлөхтөрө муусука абылаҥар куустардылар, үрдүк таһымы, маастарыстыбаны көрдөрдүлэр. Көрөөччү хас биирдии тахсар тыаһы иһиллии, хамсаныыны сэргии олордулар.

Тэрээһин сүрүн төрдүн, умнуллубат түгэнин күрэх киэһэтин ыытааччылар – Алексей Жирков уонна кэрэчээнэ Арина Хоютанова кыттааччылары тэҥэ, көрөөччүлэри эмиэ биир тэтимҥэ тутан киэһэни киэргэттилэр, умнуллубат түгэни бэлэхтээтилэр.

Күрэххэ кэрэ куолар дьылҕаларын дьоһун дьүүллүүр сүбэ састааба быһаарда:

Владимир Слепцов - дьүүллүүр сүбэ бэрэссэдээтэлэ, Дьокуускай куорат Дууматын дьокутаата, патриотическай иитии сулууспатын салайааччыта; Пётр Тастигин – Сайсары уокуругун дьаһалтатын салайааччыта;

Кирилл Соболев — Дьокуускай куорат Дууматын дьокутаата, «Я расту со спортом» АНО салайааччыта;

Ульяна Скрябина — туруорааччы режиссёр, «Миссис Лига-2024» күрэх кыайыылааҕа;

Александра Самсонова – Саха политехническэй лицей иитэр үлэҕэ директоры солбуйааччыта.

Дьүүллүүр сүбэ быһаарытынан, өр мөккүһүү кэнниттэн кыайыылаахтары, бастыҥнары ааттаатылар:

«Миссис Креативность» — Анна Силина (Гагарин уокуруга);

«Миссис Стиль» — Лия Герасимова (Киин уокурук);

«Миссис Элегантность» — Анна Сверчкова (Губинскай уокурук);

«Миссис Интеллект» — Юлия Аргунова (Автодорожнай уокурук);

«Миссис Талант» — Сардаана Кривогорницына (Октябрьскай уокурук);

«Миссис Грация» — Елена Иванова (Октябрьскай уокурук);

«Миссис Очарование» уонна «Миссис Зрительских симпатий» — Марианна Дмитриева (Строительнай уокурук);

«2 Вице Миссис Лига» — Надежда Федотова (Тулагы Киллэм нэһилиэгэ);

«1 Вице Миссис Лига» — Матрёна Огоюкина (Сайсаар уокуруга);

Кэрэттэн кэрэ, бастыҥтан бастыҥ “Миссис Лига-2025” үрдүк аат Туйаара Готовцева (Киин уокурук) бары өттүнэн дэгиттэр талааннаах, таһыччы бэлэмнээх буолан ааттанна.

Былырыыҥҥы күрэх кыайыылааҕа Ульяна Скрябина долгуйан туран, кыайыылаахха хоруонаны дохсун ытыс тыаһынан доҕуһуоллатан кэтэттэ. Кыайыылаах төбөтүн киэргэппит хоруона анаан-минээн кэрэ көстүү, талба талаан күрэҕэр диэн, тарбаҕар талааннаах маастар Анна Бояршинова чочуйан, таҥан оҥорбута дьону сөхтөрдө. Бары кыттааччыларга өйдөбүнньүк лиэнтэ, кэрэ бэлэхтэри уонна сиэдэрэй сибэкки дьөрбөлөрүн туттардылар.

Күрэх түмүктэммитин кэннэ кыттааччылар тэрийээччилэргэ махталларын тиэртилэр, маннык таһымнаах күрэххэ кыттыы, атын эйгэ дьонун кытта алтыһыы инникитин сайдыы, үтүө холобур, саҥа бырайыактары уонна ситиһиилэри түстүүр диэн астыннылар. Ону таһынан, күүс-көмө, өйөбүл буолбут тэрилтэлэргэ, чугас дьонноругар, доҕоттордоругар эмиэ истиҥ тыллары анаатылар.

Көрөөччүлэр тэрээһин үрдүк таһымын, кыттааччылар бэлэмнэрин, дэгиттэр талааннарын бэлиэтээтилэр, күрэх былаһын тухары истиҥ сыһыан уйата буолла.

Күрэх кэрэ түгэннэрин, истиҥ мичээрдэри, үгүс үөрүүнү, фотограф Антонина Васильева хаартыскаҕа түһэрэн үйэтиттэ.

Тэрийээччилэр, уокурук дириҥ махталларын көмөлөспүт, өйөөбүт бары өйөөччүлэригэр уонна спонсордарыгар тиэрдэр:

• «Твоя мода» маҕаһыын (директор О. Ф. Какуркина);

• «Комплимент_якт» маҕаһыын (директор В. В. Матренинская);

• Владимир Владимирович Аммосовка — Дьокуускай куорат Дууматын дьокутаатыгар, МУП «Аптеки города Якутска» гендиректор

• Владислав Сергеевич Парфёновка — Дьокуускай куорат Дууматын дьокутаатыгар

• Анна Коммунаровна Бояршиноваҕа —Дьокуускайдааҕы гуманитарнай колледж преподавателигэр (кыайыылаах хоруонатын маастарыгар);

• Антонина Васильевна Васильеваҕа — хаартыскаҕа түһэрбит фотографка.

​Бу күрэх куорат култуурунай олоҕор биир дьоһун тэрээһин, дьолу түстүүр Дьокуускай куорат кэрэ буолууну, талба талааны түстүүр киин күүс буоларын өссө төгүл итэҕэттэ. «Миссис Лига – 2025» күрэх дьахтар көстөр дьүһүнэ эрэ буолбакка, кини ис туруга, эйгэтэ, айылгыта, мындыра уонна олоҕу хамсатар сүдү күүс буоларын көрдөрдө. Маннык тэрээһиннэр көрүнньүк биир күннээх көр-нар аралдьытар эрэ буолбакка, инникитин дьолу түстүүр, дьону түмэр уонна саамай сүрүнэ, аныгы олоххо ийэ, дьахтар оруолугар суолта биэрэр, дьиэ кэргэн, оҕо-ыччат иитиитигэр – сайдыытыгар болҕомтону ууруу буолар.

​«Миссис Лига – 2025» күрэх кыайыылаахтары эрэ ааттаталаабата, бу күрэх нөҥүө куорат общественнай олоҕор саҥа сүүрээн уонна хамсааһын, аныгы дьахтар, ийэ оруолун үрдэтии, олоҕу кытта тэҥҥэ хаамыы. Бу кэрэхсэбиллээх тэрээһин кэрэ көстүү бэлиэтэ, өй-санаа туруга уонна олорор-үлэлиир төрүт түөлбэҕэ туһаны аҕалыы, бары өттүнэн эргиччи сайдыы буолар. Киһи барахсан – Айыы аартыгын арыйар, күн суолун тутуһар, арҕаһыттан тэһииннээх, көхсүттэн көнтөстөөх, өркөн өйдөөх аатыран орто туруу дойдуга – күн сиригэр мутугунан быраҕар муҥур үйэтигэр өйүнэн-санаатынан тугу эрэ ыйдаҥардан сырдатаары, илиитинэн-атаҕынан тугу эмэ оҥорон туһалаары, кэнэҕэски кэлэр кэнчээригэ кэскиллээҕи, үүнэр көлүөнэҕэ үйэлээҕи хааллараары олорор буоллаҕа эбээт…