Миниистир Кыайыы күнүнэн эҕэрдэлээтэ

Спорт миниистирэ Леонид Спиридонов, миниистири солбуйааччы Гаврил Мохначевскай уонна Спорт бэтэрээннэрин сэбиэтин бэрэссэдээтэлэ Гаврил Сивцев ыам ыйын 6-7 күннэригэр «Триумф» уораҕайыгар Аҕа дойду Улуу сэриитин оҕолорун күндүлээтилэр-маанылаатылар, эҕэрдэлээтилэр, сибэкки дьөрбөтүн, бэлэхтэрин туттардылар. Саха сирин спордугар үлэлээбит, билигин бочуоттаах сынньалаҥҥа олорор 80 саастарын ааспыт бэтэрээннэр ааспыт кэмнэрин ахтан-санаан аастылар.

Миниистир Леонид Спиридонов бэйэтин эҕэрдэ тылыгар Улуу Кыайыы 80 сыллаах үбүлүөйүн суолтатын, кыайыыны аҕалбыт буойуннар, үлэ, сэрии бэтэрээннэрэ  чиэстэнэллэрин, үгүс дьаһаллар, олор истэригэр физкултуурунай-спортивнай үлэлэри министиэристибэ 18 тэрилтэтэ, улуустарга 11 Олимпийскай солбук оҕо спортивнай оскуолалара тэтимнээхтик ыыталларын, чэбдигирдэр сэрээккэлэр көхтөөхтүк саҕаламмыттарын, нэһилиэнньэ спорду сэҥээрэрэ күүһүрэн иһэрин, аналлаах тутуу сыллата эбиллэрин бэлиэтээтэ. Маны сэргэ спартакиадалар ыытыллалларын, маассабас үрдүүрүн, Саха сирин спортсменнара спорка ситиһиилэринэн үөрдэллэрин, араас көрүҥнэргэ Арассыыйа, Европа, аан дойду, Олимпийскай оонньууларга тиийэ чөмпүйүөн, призер буолуталыылларын тоһоҕолоото. Спорду үрдүк таһымҥа тиэрдэр физкултуура учууталларынан, тренердэринэн, тэрийэр-салайар үлэһиттэринэн, спорт бэтэрээннэринэн  киэн туттуу баарын, физкултуура-спорт эйгэтин бастыҥнара үрдүк сыанабылы ылалларын, Ил Дархан «Үлэ киһитэ» бириэмийэтинэн наҕараадаламмыттарынан дьон-сэргэ киэн туттарын, быйыл Тааттаҕа Манчаары оонньууларыгар бэлэмнэнии күргүөмнээхтик бара турарын,  стадион күрэхтэһиини ыытарга бэлэмин, элбэх өрүттээх улахан спортивнай комплекс, Чөркөөххө модульнай спортивнай саала тутуулара түмүктэнэн эрэллэрин бэлиэтээтэ.

Көҥүл тустууга Арассыыйа чөмпүйүөнэ, ССРС Сэбилэниилээх Күүстэрин үрүҥ көмүс призера, 90-сылларга спорт миниистиринэн үлэлээбит Петр Егорович Попов; хоту көһөрүллүүгэ сылдьыбыт, өрөспүүбүлүкэ спордугар сүрүн буҕаалтырынан үлэлээбит, сахалартан бастакы норуоттар икки ардыларынааҕы кылаастаах спорт маастара Алексей Ермолаев эдьиийэ 88 саастаах Сусанна Николаевна Ермолаева; олоҕун бүтүннүүтүн спорка анаабыт, «Үлэ киһитэ» лауреатын үрдүк аатын ылбыт Маргарита Григорьевна Куличкина: «Спартак» физкултуурунай-спортивнай уопсастыба үлэһитэ, сүүрүгэ-быһыйа, баскетболга  өрөспүүбүлүкэ чөмпүйүөҥкэтэ, ГТО нормативтарын туттарыыга ССРС чөмпүйүөҥкэтэ, Дьокуускай куорат спорка управлениетын начаалынньыгынан үлэлээбит Галина  Степановна Сырмолотова; 60-с сыллардаахха өрөспүүбүлүкэ буулдьанан ытыыга чөмпүйүөҥкэтэ, күн бүгүнүгэр диэри судьуйалыыр Римма Павловна Алексеева; көҥүл тустуу уонна хайыһар спордун тренерэ, аан дойду чөмпүйүөннэрэ уолаттардаах Степан Степанович Контоев спорка ситиһиилэрин, үлэлэрин кэпсээтилэр. Көҥүл тустууга өрөспүүбүлүкэ бастакы чемпионатын кыайыылааҕа, спорт кэмитиэтин бэрэссэдээтэлинэн үлэлээбит Семен Иванович Алексеевы, буҕаалтырдар Матрена Петровна Алексееваны, Мария Дмитриевна Заровняеваны дьиэлэригэр тиийэн көрсөн эҕэрдэлээтилэр.

Үүттээх итии чэйи иһэ олорон кэпсэтии истиҥник-иһирэхтик ааста. Аҕам саастаах сэрии сылларын оҕолоро өрөспүүбүлүкэ спорка салайааччыларыгар махтаннылар, Саха сирин спортсменнарыгар ситиһиилэри, кыайыылары-хотуулары баҕардылар.