«Мин куоратым... олохтоохтор кыһалҕаларын быһаарар...» — диэм этэ...

Кэккэ сылларга оптуобус сырыыта барыбытын долгутар. Бүгүн «Загороднай» кыбартаал олохтооҕо Аркадий Аммосов кыһалҕатын таһаарабыт.

– Биһиги Дьокуускай куорат «Загороднай» диэн кыбартаалыгар Кржижановскай уулусса, 75/1, 2, 3, 4, 6 нүөмэрдэригэр түөрт-биэс этээстээх дьиэлэргэ, ону таһынан ахсаана биллибэт кэтэх дьиэлэр быыстарыгар олоробут. Кыбартаал олохтоохторо 35 уонна 16№-дээх оптуобустарынан туһанабыт. Оптуобуспут тохтобула Очиченко уонна Кржижановскай уулусаларын быһа охсууһууларыгар турар, ол эбэтэр биһигиттэн 500 м тэйиччи. Былырыын оптуобус сырыытын уларытыыга 35№-дээх  оптуобус бүтэһик тохтобулун Рихард Зорге уул. дуу, 1№-дээх холуонньа таһыгар дуу туруорарга куоластааһын ыытыллыбыта. Бүттүүн 1№-дээх холуонньаҕа туруорарга диэн куоластаан кыайан турабыт. Холуонньаттан 35№-дээх оптуобус биир өттө Очиченко уулуссанан «Столичнай» ырыынак диэки барар, оттон биирэ Кржижановскай уулусса быһа охсуһуутугар өҕүллэн, Сэбиэскэй Аармыйа диэки салаллар.

Бэйэм харахпынан 2-с группалаах, ХИФУ-га үөрэнэр кыыһым оҕо эрдэҕиттэн инбэлииппит. Кыһалҕалаах биһиги эрэ буолбатахпыт, бу кыбартаал олохтооҕун барытын кыһалҕата. Манна торуоскалаах кырдьаҕастар, өйөнсөн хаамар сааһырбыт дьон, оҕо аймах элбэх. Тоҕо диэтэххэ, дьиэбититтэн таҕыстахпытына, чугаһынан биир да тохтобулбут суох. Хата, бородуукта маҕаһыынын кытта социальнай аптека аһыллан абыраата. Очиченко уулуссаҕа пивбар уонна арыгынан эргинэр «Ремикс» маҕаһыын бааллар. Почтабыт, управабыт, инбэлииттэр реабилитационнай кииннэрэ, 202-с түөлбэҕэ турар оҕо поликлиниката, ХИФУ, поликлиника барыта атын хайысханан тураллар. Аны бу олорор кыбартаалбытыгар чугаһынан, бэл, банкомат суох. Этэргэ дылы, наадалаах сирбитигэр хас да оптуобуһунан айаннаан тиийэбит. Биир тохтобулбут дьиэбититтэн Челюскин уулуссатыгар диэри 823 м тэйиччи, биир – 500 м., эргийэн баран төттөрү холуонньа диэки бардахпытына – 400 м; ол аата холбоон 900 м хаамыахпытын наада.

Бу кыһалҕанан оптуобус сырыытыгар анал сыһыарыы тахсыбытыгар эрийэ сылдьыбыппын «быһаарыахпыт» диэбиттэрэ сыл аҥаарыттан орто. Аны, киһи кыһыйыах, Кржижановскай уулуссаҕа өрөмүөн ыытылла турар буолан, ыарахан уйуктаах, паромҥа киирэр-тахсар массыыналар ааһаллар. Биһигини ымсыырдан, 19, 6, 35№№-дээх оптуобустар тохтоло суох сыбыытыыллар, ол биһиэхэ ханнык да көмөнү оҥорбот. Биһиги баҕарбыппыт курдук, суоппар көҥүлэ суох сиргэ түһэрбэт.

Сэбиэскэй кэм саҕана 16 уонна 35№№-дээх оптуобустар сылдьар эбиттэр, билигин да «Некст» маҕаһыыҥҥа диэри киирэн тахсыахтарын сөп курдук. Көрдөххө, муоста, суол өрөмүөннэммит эрээри... тохтобул төннүбэтэх.

Бу суруйуубун туһааннаах салайааччылар ааҕан, олохтоохтор кыһалҕаларын туоратарга, кыбартаалга тохтобул туруорарга ылсаллара буоллар, төһөлөөх үөрүөхпүт этэй?! «Мин куоратым олохтоохтор кыһалҕаларын туоратарга  үлэни ыытар» диэхпит этэ.

Хаартыскалар: Ааптар тиксэриитэ