Мин хос хос эһэм — Аҕа дойду Улуу сэриитин саллаата

Биһиги аймахтан Аҕа дойду Улуу сэриитигэр 4 киһи кыттыбыта: хос хос эһээлэрим Верховцев Ефрем Михайлович, Дмитриев Василий Тимофеевич, абаҕабыт Данилов Афанасий Афанасьевич, күтүөппүт Холмогоров Илья Федотович.

Хомойуох иһин, кинилэртэн биир эрэ киһи – хос хос эһэм Василий Тимофеевич тыыннаах эргиллибитэ. Абаҕам уонна күтүөппүт сэрии толоонугар сураҕа суох сүппүттэрэ. Кинилэр оҕолоро суоҕа. Хос хос эһэм Верховцев Е.М. көмүс уҥуоҕа Тверь куорат аттыгар Братскай кылабыыһаҕа көмүллүбүтэ. Киниттэн биир кыыс оҕо хаалбыта.

Хос хос эһэм Василий Тимофеевич сэриигэ 1941 сыллаахха ыҥырыллыбыт. Оччолорго кини холкуоска биригэдьиирдиир этэ. Дойдутугар ийэтэ Марыына, кэргэнэ Балбаара, Мотя, Виктор уонна Коля диэн үс кыра оҕолоро кэтэһэ хаалбыттара. Оччолорго Дмитриевтэр Мэҥэ Хаҥаласка Саха Бэстээҕэ диэн сиргэ олорбуттара.

1942 с. от ыйыгар Василий Тимофеевич сэрииттэн элбэх бааһырыылаах, сэрии 1 группалаах инбэлиитэ буолан, дьоҥҥо көтөхтөрөн кэлбитэ. Кини кыратык эмтэнэ түһэн баран, страховка агенынан Майаҕа үлэҕэ киирбитэ. Сэрииттэн кэлбитин кэннэ икки кыыс оҕо төрөөбүтэ: Люба уонна Маня. 1949 с. сэриигэ ылбыт баастарыттан өлбүтэ.

Биэс оҕоттон улахаттара Мотя уонна Виктор 8-9 саастарыттан холкуос араас үлэтигэр үлэлээн, дьоллоох оҕо саас диэни билбэтэхтэрэ. Хос хос эбэм Варвара Михеевна наһаа ыарахан олохтооҕо. Холкуоска ыанньыксыттаан, уокка оттор мас кэрдэн, бурдук ыһыытыгар, от үлэтигэр үлэлээн, интэринээккэ уонна оскуолаҕа повардаан, 5 оҕотун барыларын үөрэттэрбитэ. Мотя медсиэстэрэ, Виктор зоотехник, Коля телемаастар, Люба уонна Маня учуутал идэлэммиттэрэ.

Мин Аҕа дойду Улуу сэриитин кыттыылаахтара аймахтарбынан киэн туттабын!

Матырыйаал уонна хаартыска podvigyakutska.ru саайтан ылылынна