Миини тымныылыы иһиэххэ сөп

Нуучча омук тымныы мииннэрэ

Окрошка – кыра гына кырбастаммыт оҕурсу, редиска, хортуоппуй, буспут сымыыт, күөх от арааһыттан кутуллар, убатарга квас эбэтэр кефир туттуллар. Тотоойу буоллун диэн ууга буспут эти, халбаһыны кырбаан эбиэххэ сөп.

Свекольник – сүбүөкүлэ оргуйбут уутугар оҥоһуллар (сороҕор квас эбии куталлар). Буспут сүбүөкүлэ, оҕурсу, буспут сымыыт, күөх луук уонна укроп туттуллар. Остуолга ууруох иннинэ сүөгэйдиибит.

Ботвинья – окрошкаттан элбэх састааптаах буолар. Кииһилэ, шпинат, крапива оргуйбут уутугар кваһы эбиэххэ сөп. Буспут уонна ыыһаммыт балыгы кытта остуолга уураллар. Сибиэһэй күөх от, хрен эбиллэр.

Тюря – саамай былыргы сөрүүннүү иһиллэр миин. Туустаах ууга эбэтэр кваска хаппыт килиэби бытарытан сииллэр.

Белорустар тымныы мииннэрэ

Холодник диэн ааттаах. Свекольникка маарыҥныыр, ол эрэн квас оннугар үүт аннын, кефири тутталлар. Сөбүөкүлэ, оҕурсу, сымыыт, күөх тума арааһын куталлар. Кыратык лимон сүмэһинин таммалатыахха сөп – аһыытын намыратар. Остуолга буспут хортуоппуйу кытта биэрэллэр.

Аан дойду атын дойдуларыгар эмиэ тымныы миини иһэллэр

Гаспачо – андалускай куухуна символа. Пюре курдук миин. Манна помидор, оҕурсу, болгарскай биэрэс, луук, чеснок, килиэп, оливковай арыы, уксус наада. Фрукта, эриэхэ эбиэххэ сөп.

Таратор – Балканылар аатырдар мииннэрэ. Йогуртка майгынныыр кефирдэригэр оҥоһуллар, оҕурсу, чеснок, грецкэй эриэхэ, укроп уонна оливковай арыы туттуллар.

Довга - азербайджан бүлүүдэтэ. Йогуртка ириис, күөх тума оттору уонна бурдугу куталлар.

***

Тымныы миини оҥоруу сүрүн быраабылата:

• Миин уутугар квас (окрошкаҕа туттуллар кваһы наһаа аһыппаттар эбит), аһытыллыбыт үүт ас (кефир, простокваша, йогурт), оҕуруот аһа, фрукта туттуллар.
• Сиэхтэрин иннинэ үчүгэйдик тымныталлар. Бэл, кубиктыы муус быраҕыахха сөп эбит.
• Классика буолбут ырысыаптарга ким тугу сөбүлүүрүнэн тугу баҕарар эбии кутуон сөп.