Миграннар түһээннэрэ үрдүүр чинчилэннэ

Дойду таһымыгар бу боппуруоһу быһаарсан ырааппыттар. Ол курдук, соторутааҕыта Судаарыстыбаннай Дуума бэрэссэдээтэлэ Вячеслав Володин РФ Нолуокка Кодексыгар уларытыылары киллэрэр сокуон барылын бэлэмнээн, Бүддьүөт уонна  нолуок кэмитиэтигэр  киллэрбиттэрин эттэ. НК иккис чааһыгар киириэхтээх уларытыы чуолаан миграция эйгэтигэр көрүллэр  түһээни (пошлинаны) үрдэтиигэ сыһыаннаах.

Бэрэссэдээтэл бу дьыл ыам ыйын 12 күнүгэр буолуохтаах Госдуума мунньаҕар туһааннаах боппуруоһу көрөр болдьоҕу быһаарыах тустаахтарын эппит. “Дойдуга миграция бэлиитикэтин ситэрэн-хоторон, тупсаран биэрии биһиэхэ тыын суолталаах. Итинтэн сибээстээн, киирбит көҕүлээһини хайа сатанарынан уталыппакка быһаара сатыахпыт», – диэбит.

Дьокутааттар көрүүлэригэр киирбит сокуон барылыгар ыйыллар нуормаҕа олоҕурар буоллахха, миграннар түһээннэрэ маннык үрдүөн сөп:

- тас дойду гражданина Арассыыйа гражданина буолбакка эрэ биһиги дойдуга уһун кэм устата эбэтэр бастайааннай өрүккэ олорор бырааптанарын туһунан докумуону ыларыгар (вид на жительство) төлүүр түһээнин 30 тыһ. солк. диэри үрдэтэр этии киирбит. 2026 сылга ити түһээн 6 тыһ. солк. тэҥнэһэрин бэлиэтиир тоҕоостоох.

- тас дойду гражданиныгар Арассыыйаҕа быстах кэмҥэ олорор көҥүлү ыларыгар төлүүр түһээнэ 15 тыһ. солк. диэри үрдүөн сөп. Оҥоһуу Өй биэрбит чахчытынан, ол төлөбүр күн бүгүн 1600 солк. эрэ эбит.

- тас дойду гражданина үлэлиир быраабы ыларыгар төлөһөр түһээнэ билигин 4200 солкуобай. Ону 5 тыһ. солк. диэри үрдэтэргэ этии киирбит.

Итини таһынан тас дойду олохтоохторун үлэҕэ ылар уонна кинилэри үлэлэтэр быраабы ылыы түһээнэ хас биирдии үлэһит аайы 15 тыһ. солк. диэри үрдүөн сөп.

Дьэ, ити курдук, миграннартан ылыллар атын да нолуок төлөбүрдэрин үрдэтэр туһунан көҕүлээһин ити саҥа барылга киирбитин бэлиэтээтэ.

Вячеслав Володин: “Биһиги дойдуга олоро уонна үлэлии кэлээччилэр нуучча тылын, Арассыыйа сокуоннарын билиэхтээхтэр, биһиги духуобунас, сиэр өттүнэн сыаннаспытын, култуурабытын убаастыахтаахтар, кинилэр манна олоруулара экэниэмикэ өттүнэн төрүөттээх буолуохтаах. Түһээни улаатыннарыы дойду хааһыната сыллата 15 млрд солк. тахса үбүнэн хаҥыырыгар көмөлөһүө”, – диэбит.

Ону таһынан өссө биир суолталаах иһитиннэриини баар. Ол – сокуону кэспит миграннары дойдуларыгар төттөрү утаарарга төрүөт буолар административнай кэһиилэр кэрискэлэрин кэҥэтэр туһунан сокуон барыла көрүллээри сылдьара. Ити этиллэр барыта олоххо киирдэҕинэ, тустаах эйгэҕэ бэрээдэк олохтонуоҕун үллэстибит.

Манна даҕатан, кини 2024 сылтан бэттэх миграция бэлиитикэтин тупсарар туһугар Госдуума хайыы үйэ 22 дойду сокуонун ылыммытын санаппыт. 

Ону таһынан Дуума бэрэссэдээтэлэ СНГ дьыалаларыгар уонна биир дойдулаахтары кытта сибээс кэмитиэтигэр  тас дойду гражданнара быстах кэмҥэ олорор – ол иһигэр үөрэнэр сыаллаах кэлбиттэргэ эмиэ – көҥүлү биэрэр докумуон дубликатын ылалларыгар судаарыстыбаннай түһээни төлүүр эбээһинэстэнэллэрин олохтуур гына, уларытыыны киллэрэр туһугар “РФ тас дойду гражданнарын быраапка балаһыанньаларын туһунан”, “РФ гражданствотын туһунан” федеральнай сокуоннар уларыйыылаах барылларын ыыппытын иһитиннэрбит.