Мичийээнэ айар киэһэтэ

Алтынньы 8 күнүгэр М.К. Аммосов аатынан ХИФУ профсойууһун тэрийиитинэн Арассыыйа Худуоһунньуктарын сойууһун, норуоттар икки ардыларынааҕы федерацияларын, "Ситим" көҥүл суруйааччылар сойуустарын чилиэнэ, норуот маастара, култуура туйгуна Санникова Вера Афанасьевна-Мичийээнэ айар киэһэтэ үрдүк таһымҥа буолан ааста.

Тэрээһини ХИФУ Научнай библиотекатын сүрүннүүр библиотекара Е.В. Романова сэргэхтик иилээн-саҕалаан ыытта.

"Синергия" библиотека киэҥ, сырдык саалатыгар Вера Афанасьевна тикпит сахалыы сиэдэрэй таҥастара, чаппараахтара уо.д.а. оҥоһуктара тупсаҕайдык аттарыллан туруоруллубуттар. Мичийээнэ араас хайысхаҕа элбэх үлэтиттэн биир сонун, сэдэх көрүҥ – айылҕа күндү таастарынан таҥар хартыыналара – куруук дьон болҕомтотун тардан, улахан сэҥээриини, биһирэбили ылаллар. 

Кини туттар тэриллэрэ – кыһыл көмүс иннэ, үрүҥ көмүс куорсун уонна аптаах киистэ көмөлөрүнэн дууһатын иэйиитин хайдах баҕарар көҥүл айан таһаарар кыахтаах эргиччи талааннаах киһи.

Ол курдук, бу дьоро киэһэ тэриллибит төрүөтэ – Мичийээнэ хоһооннорун хомуурунньуга "Палитра души" диэн нууччалыы тылбаастанан тахсыбытын бэлиэтээһин.

Айар куттаах доҕотторо Мичийээнэ хоһооннорун аахтылар, кини тылларыгар суруллубут ырыалары толордулар. 

Бэйэтэ да аахта, итиэннэ үлэлиир тэрилтэтигэр махтанан туран, библиотекаҕа ааптарыскай кинигэлэрин бэлэхтээтэ.

Кэрэни кэрэхсиир кэлбит дьон бары астынан-дуоһуйан тарҕастылар.

Онон биһиги, Вера Афанасьевна доҕотторо, аймахтара, ХИФУ профсойууһун кэмитиэтигэр, Научнай библиотека салалтатыгар, Е.В. Романоваҕа маннык үлэһит киһиэхэ суолта биэрэн, ааттаан-суоллаан, чиэстээн-бочуоттаан бэртээхэй киэһэни тэрийбиккитигэр ис сүрэхтэн махталбытын биллэрэбит, барыгытыгар үтүөнү кэрэни, сырдыгы баҕарабыт!

Хаартыскаларынан ааптар хааччыйда