Мэр хайдах буолуохтааҕый?

Дмитрий Садовников Дьокуускай куорат баһылыгынан үлэтин саҕалаабыта икки ыйга тиийбэт кэм ааста. Онон кэпсэтии каадыр, салалта, уопсайынан, аныгы үйэ салайааччытын тула ыйытыылары тумнубата.

Паарка уонна Архитектура департаменын салалталарын туһунан

Дмитрий Садовников Култуура уонна сынньалаҥ пааркатыгар 40-ча урбаанньыт үлэлиирин үрдүнэн салалта үлэһит ахсаана тиийбэт диирэ оруна суоҕун бэлиэтээтэ. Санатар буоллахха аҕыйах хонуктааҕыта баһылык Куорат пааркатыгар тиийэ сылдьан, кэккэ итэҕэстэри ыйбыта. Мантан сиэттэрэн Куорат пааркаларын уонна уопсастыбаннай туоналарын дириэксийэтин салайааччыта Роман Евсееви үлэтиттэн ууратар былаан баарын иһитиннэрдэ.
Архитектура департаменыгар эмиэ уларыйыы барара сабаҕаланар. Куорат кылаабынай архитектора Семен Сергеев төһө да бу дуоһунаска уһуннук үлэлээтэр, уларытыллар сибикилээх. Ол эрээри уокуруктар баһылыктара өр үлэлиэхтээхтэрин, уларыт да уларыт буоллахха, үлэ тахсыбатын тоһоҕолоото.

Салайааччы туһунан

Дмитрий Садовников: "Саҥа салайааччы кэллэҕинэ сүрүн үлэһиттэр, урукку хамаанда барыта уларыйыахтаах диэн буолбатах. Бары историяҕа суол хааллараллар. 
Билиҥҥи үлэһиттэр уруккулардааҕар таһаарыылаахтык, таһымнаахтык үлэлиэхтээхтэр. Кэм ирдэбилэ оннук. Хас кэлбит салайааччы уруккуну баһыйар буолан иһиэхтээх",- диэн санааны тутуһарын бэлиэтээтэ. Бу күн кини суруналыыстарга бэйэтин хамаандатын биирдии-биирдии ааттаталаан туран билиһиннэрдэ. 

Дмитрий Садовников:
- Бастатан туран солбуйааччыларбын анаатым. Бастакы солбуйааччым Андрей Лебедев куоракка үлэлээбитэ ыраатта, уопуттаах, ОДьКХ Департаменын салайбыта, Куорат Дууматын дьокутаата, “Экосети” салайбыта, Жатайтан төрүттээх.
Алена Неустроева эмиэ баай уопуттаах. Билиитэ киэҥ, көхтөөх, үчүгэй үлэһит. Ньурбаттан төрүттээх. Сөбүлэспитигэр үөрдүм.
Алексей Гарагуля уруккута ИДьМ үлэһитэ, юрист, эмиэ уопуттаах үлэһит. Өлүөхүмэттэн төрүттээх.
Ольга Яшина Киевкэ төрөөбүт. Бу иннинэ оскуола дириэктэрэ этэ. Күүстээх хамаанда тэриниэн наада.
Евгений Пермяков Хатаһы салайан олорбута. Көрдөххө чуумпу, наҕыл курдук эрээри, олус өйдөөх, тыа хаһаайыстыбатыгар билиилээх уол.
Антон Артемьев үөрэҕинэн экономист, секретариаппын салайбыта. Үлэһит, көхтөөх, бэриниилээх.
Валентин Романов урукку хамаандаттан хаалла. АБДь хайысхатынан дьарыктанар. Ол эрэн уурайар санаалаах, солбуйар киһитин бэлэмнээн хаалларыахтаах",- диэн кылгастык билиһиннэрдэ.

 “Мэр хайдах буолуохтааҕый?" 

Дмитрий Садовников суруналыыстарга бэйэтэ эмиэ ыйытыы туруорда: 
“Мээр хайдах буолуохтааҕый? Сорохтор миэхэ күннээҕи бытархай боппуруостарынан дьарыктаныма, хамаандаҕар сорудахтаан ис, норуокка чугастык сырыт дииллэр. Сорохтор глобальнай бырайыактарынан бар, Дьокуускай 400 сылыгар бэлэмнэн дииллэр…” - диэн суруналыыстар санааларын интэртэһиргээбитэ саҥа баһылык эдэр да, эмэн да дьон санаатын ытыктыырын, суолта уурарын бэлиэтиэн сөп.

Оттон эһиги санааҕытыгар хайдаҕый?