Мээрийэ куораты көҕөрдөргө турунар
Дьокуускай дьаһалтата 2032 сылга диэри куораты көҕөрдүү былаанын оҥорорго 1,3 мөл. солк. көрдө. Территориялары кытта үлэлиир департамент «Ландшафтный Центр Якутии» ХЭТ кытта дуогабар түһэристэ. Хампаанньа тендергэ кыайан, бырайыактааһын ороскуотун мөлүйүөн аҥаара солкуобайга диэри кыччатта.
Тэхиньиичэскэй ирдэбил быһыытынан, тутааччылар куорат иһигэр баар бары күөх сирдэргэ толору инвентаризация ыытыахтаахтар, сиһилии сири-уоту бүрүйүү каарталаах реестр оҥоруохтаахтар, саҥа пааркалары, болуоссаттары, аллеялары туруорууга этиилэри киллэриэхтээхтэр, улахан тымныылары тулуйар үүнээйи көрүҥнэрин талыахтаахтар. Дуогабарга өссө автоматическай уунан хааччыйыы систиэмэлэригэр, туруору (вертикальнай) көҕөрдүүгэ, дьиэ сарайдарын уонна эркиннэрин көҕөрдүүнү быһаарар булгуччулаах пуун киириэхтээх.
Бырайыак атын улахан хамсааһыннары кытта тэҥҥэ олоххо киирэр: 2028 сылга диэри куорат Култуура уонна сынньалаҥ паарката 17 гектарынан кэҥээн, төгүрүк сыл үлэлиир буолуоҕа.
Сонуннар
Ордук ааҕаллар
