Матвиенко Хатас оскуолатын хайҕаата

Ыам ыйын 25-26 күннэригэр Москваҕа Бүтүн Арассыыйатааҕы тыа сирин үлэһит дьонун III форумнара ыытылла турар. Бу улахан түһүлгэҕэ П.Н. уонна Н.Е. Самсоновтар ааттарынан Хатас орто оскуолатын английскай тылга учуутала Яна Портнягина оскуолатын, ону ааһан бүтүн Дьокуускай үөрэхтээһинин ааттатта.

Учуутал Хатас оскуолатын үлэтин-хамнаһын сырдатта, итиэннэ 2017 сылтан агроүөрэхтээһин бырайыактара олоххо ситиһиилээхтик киирэллэрин кэпсээтэ.  

Федерация Сэбиэтин бэрэссэдээтэлэ Валентина Матвиенко Хатас оскуолата агроүөрэхтээһин үтүө холобура буоларын бэлиэтээтэ уонна: «Бэйэтин хааччынар, үтүө туруктаах бөҕө тыа сирэ – күүстээх, тутулуга суох, бэйэтин ытыктанар дойду бэлиэтэ», – диэтэ. Кини үөрэх кыһатын үтүө уопутун хайҕаан эрэ кэбиспэтэ, ону тарҕатарга ыҥырда.

Бүгүҥҥү туругунан оскуола кэпэрэтиибэ 20 гектар сирдээх. Үөрэнээччилэр бородууксуйалара Бүтүн Арассыыйатааҕы «Золотая осень» агробырамыысаланнай быыстапкаҕа  сыллата кыайыы, ситиһии көтөллөнөр, «Арассыыйа 100 бастыҥ табаара» ахсааныгар киирэр, оскуола аһылыгар туттуллар уонна СВО кыттыылаахтарыгар ыытыллар.

2020 сылтан идэҕэ үөрэтии олоххо киирэр, үөрэнээччилэр цветовод уонна тырахтарыыс-машинист дастабырыанньаларын ылаллар.  

Бэлиэтээн эттэххэ, Хатас оскуолата  былырыын РНА тирэх оскуолатын статуһун сүкпүтэ. Манна Уһук Илиҥҥэ соҕотох «Агрокуб» диэн билим-үөрэх лабораторията баар, онно оҕолор биотехнологияны баһылыыллар, атыыга анаан бородууксуйа оҥорон таһаараллар.