Түөкүттэр санаторийдарга путевка "атыылыыр" буолбуттар

“РИА Новости” иһитиннэрбитинэн, массыанньыктар Арассыыйа олохтоохторугар 40-50 % чэпчэтиилээх путевкалары “атыылыыр” буолбуттар. Ол курдук, Кавказ минеральнай ууларыгар, Крымҥа, Краснодар курортарыгар, Алтайга баар санаторийдар интэриниэт саайтарын үүт-үкчү куоппуйалаан оҥорбуттар. Ол саайтар нөҥүө балаҕан ыйыгар, алтынньыга сынньаныан баҕалаахтарга “олус үчүгэй чэпчэтиилэри” биэрэн туран, путевкалары атыылыыллар эбит. Маныаха “бу путевкалартан килийиэннэр аккаастаннылар, барыстаахтык ылар кыахтааххыт” диэн угаайылыыллар. Төлөбүрү “официальнай модуль” нөҥүө ыыттараллар, оттон харчы атын дьон счетугар барар.

Санаторийдар саайтарын үчүгэйдик бэрэбиэркэлээҥ, официальнай төлөпүөннэригэр эрийэн билсиҥ, харчыны ыытаргытыгар ким аатыгар барарын официальнай реестри кытта тэҥнээҥ!