Массыанньыктар дьон аатыгар кирэдьиит ылар буоллулар

Массыанньыктар дьону албынныыр ньымалара аныгы технологиялары кытта тэҥҥэ сайдар. Арассыыйа үрдүнэн атын киһи докумуонунан микрозаймнары иэс ылыы элбээбит.

Массыанньыктар атын киһи пааспарын дааннайынан интэриниэт сайтартан кирэдьиит, займ ылар буоллулар. Судаарыстыбаннай өҥө порталын нөҥүө барбакка, харчы иэс биэрэр сайтар эмиэ бааллар.

Бэйэбит хайдах харыстаныахпытын сөбүй? Үгүс юристар суруйалларынан, сэрэххэ, киһи бэйэтэ-бэйэтин харыстанан, манныгы оҥостуон сөп:

— Сотору-сотору кредитнэй историябытын бэрэбиэркэлиэхтээхпит. Кредитнэй историяны сылга иккитэ босхо, судаарыстыбаннай өҥөлөр порталларын нөҥүө бэрэбиэркэлиэххэ сөп;

— Судаарыстыбаннай өҥөлөр порталларыгар баар аккауҥҥутугар двухфакторнай аутентификация оҥостоҕут. Ол аата икки күлүүстэнэҕит: бастакыгыт – пароль уонна логин; иккискит – бэйэҕитин кытта илдьэ сылдьар төлөпүөҥҥүт нүөмэрэ, онно смс кэлэр буолар. 

Бу маннык дьаһаныы массыанньыктартан 100 бырыһыан харыстыыр кыаҕа суох эрээри, кинилэр эһиги дааннайгытын булалларын уустугурдуон сөп.

Эһиги ааккытыгар атын киһи кирэдьиит ылбытын биллэххитинэ:

1) Суһаллык полицияҕа үҥсүҥ. Онлайн кирэдьиити ылбыт дьон IP-аадырыстарын о.д.а. быһаартарыҥ. Холуобунай дьыаланы арыйарга аккаас кэллэҕинэ, прокуратураҕа үҥсүөххэ сөп;

2) Микрофинансовай тэрилтэҕэ официальнай ирдэбил суруйаҕыт. Ол суруккутугар: бу кирэдьииккэ эһиги сыһыаҥҥыт суоҕун быһаараҕыт; займ туһунан информацияны сотоллоругар, туохха олоҕуран кирэдьиит бэриллибитин, ханнык докумуоннар туһаныллыбыттарын ирдиигит; дуогабардар дубликаттарын көрдүүгүт.

Кирэдьиит интэриниэт нөҥүө бэриллибит буоллаҕына, кумааҕыга оҥоһуллубут дуогабар суох буолар. Ол аата смс нөҥүө төлөпүөнтэн бигэргэммит. Ханнык нүөмэртэн код ыыппыттарын ирдэһэҕит уонна харчы түспүт счетун реквизиттэрин билэҕит;

3) Пааспаргытын уларытыҥ. Массыанньыктар тус дааннайгытын туһаммыт буоллахтарына, өссө да кирэдьиит ыла туруохтарын сөп;

4) Кредитнэй история бюротугар сайабылыанньа суруйан, историяҕытын ыраастатыҥ. Бюро бэйэтэ бэрэбиэркэ ыытар, дьиҥэ суох информацияны сотторуон сөп;

5) Суукка сайабылыанньа суруйуҥ.