Массыанньыктар аны иэстэһэр буоллулар

Түөкүттэр бэйэлэрин схемаларын билбит дьону “кэһэтэргэ”, иэстэһэргэ саҥа ньымалары айбыттар. Билигин бэйэлэрин албынныы сатаатаххына, кинилэр сиэртибэлэригэр кыһалҕаны үөскэтэр чэпчэки, ол эрээри көдьүүстээх ньымаларга көһөн эрэллэр. Онтон биир саамай тарҕаммыттарынан, баан счетун тоҥорууга тириэрдиэн сөптөөх диэн исписэлиистэр этэллэр.

Экспертэр этэллэринэн, дьон үгэс буолбут албыннары билэргэ быдан үөрүйэх буолбуттар — холобур, сымыйа курьердартан, домофоннары өрөмүөннээччилэртэн, балыыһа үлэһиттэриттэн эбэтэр сымыйа инвестиционнай бырайыактартан ​​эрийиилэр. Өскөтүн эмсэҕэлээбит киһи кэпсэтиини салҕыыртан кытаанахтык аккаастаннаҕына уонна СМС кодтары биэрбэтэҕинэ, сорох түөкүттэр “иэстэһэн” элбэх бириэмэни уонна ресурсаны эрэйбэт чэпчэки ньымалары туһаналлар. Онтон икки саамай тарҕаммыт ньыманы билиһиннэрэбит.

SMS-бомбинг. Сиэртибэ нүөмэрин араас сервистэртэн элбэх ахсааннаах суруктарынан уонна эрийиилэринэн толорон кэбиһэллэр. Түөкүттэр сорох хампаанньалар регистрациялара уонна сибээстэһэр пуормалара  куттал суох буолуутугар мөлтөх харысхаллаахтарын туһанан, электроннай почтанан бэрт дөбөҥнүк сурук ыыта охсоллор.

Экспертэр бэлиэтииллэринэн, маннык атаака туһанааччыга быһаччы улахан кутталы үөскэппэт, ол гынан баран, биллэриини ыытар хампаанньалар репутацияларын улаханнык алдьатар. Наһаа элбэх “спам” кэллэҕинэ, киһи, бастатан туран, суруктары ыыппыт хампаанньаҕа кыыһырар, дьиҥнээх массыанньыктарга буолбакка.

Түргэн төлөбүр систиэмэ нөҥүө (СБП) көһөрүүлэр. Бу ордук кутталлаах ньыма. Түөкүттэр эмсэҕэлээбит киһи каартатыгар кыра сууманы Түргэн төлөбүр систиэмэтинэн ыыталлар, ону кытта “наркотик иһин”, “каартаны атыылааһын иһин” эбэтэр атын саарбах бэлиэтээһиннэри суруйаллар.

Экспертэр Lenta.ru сайтка маннык дьаһаныылар баан кэтээн көрөр систиэмэлэрин болҕомтолорун тардалларын быһаардылар. Үп тэрилтэлэрэ килийиэннэр счеттарыгар киириини хааччахтыахтарын уонна ыытыллыбыт тылларга олоҕуран силиэстийэни саҕалыахтарын сөп. Түөкүттэр дьэ бу албыннарыгар тирэҕирэллэр, сиэртибэлэригэр улахан мэһэйи үөскэтэргэ дьулуһаллар.

Өссө биир ньыма баар, харчыны ыытыыга сыһыаннаах, чуолкайдык эттэххэ, “отмывание денег”. Дьоҥҥо билбэт киһититтэн харчы кэлэр, ону төннөрөргө көрдөһөллөр, ол гынан баран атын счекка. Сөбүлэстэххинэ, буруйу оҥорууга киирэр кутталлааххын.