Массажист муҥатыйарын истээри тиийбэтэҕим...

Уонча сылтан бэттэх куорат салоннарын барытын кэриэтэ кэрийдим быһыылаах. Ээ, Дьокуускайынан эрэ муҥурданыам дуо, сынньана тиийбит сирбэр хайаан да массажист көрдөнөр үгэстээхпин. Ол үчүгэй олохтон буолбатах...

Быһата, сиһим тоноҕоһо токур буолан, эбиитин киһи өйүгэр киирэн испэт эгэлгэ элбэх диагнозтаах (онтон хондуруос эрэ диэни өйдөөн хаалбыппын) муҥнаах ол бэйэлээҕим субу-субу баарын биллэрэн, бэргээн, хам тута сыһан ууга-уокка түһэрэр.

Үчүгэй массаж кэнниттэн чэпчээн, сирэйим-хараҕым сырдаан хаалар, тыый, сороҕор саҥа төрөөбүт оҕо курдук сананабын, көтүөхпүн кынатым эрэ суох буолар ээ. Оннук баай “уопуттаах” килийиэн бу сыллар тухары араас маастарга сылдьан кэллим.

Көхсүм барыта тыҥырах суола буолбут этэ...

Куорат киинигэр турар салоҥҥа бэркэ сөбүлээн сылдьан испитим, онтон үктэммэт буолбутум...

Биир кыһын сиһим ыарыыта бэргээн, суһаллык массажка барарга быһаарынным. Ол иннинэ мэлдьи сылдьар маастарым ити күн солото суох буолан, атын үлэһиккэ, эбиитин сарсыныгар 9 ч суруйдулар.

Сарсыарда харахпын хайа тардаат, кыһыҥҥы будулҕан тымныыга хоочугураан, оптуобуспун син өр күүтэн, ырдьаччы тоҥон тиийдим. Администратор үөрэ көрүстэ. «Маастарыҥ кэлиэҕэ, баһаалыста, манна олорон күүтэ түс», – диэтэ. 10-15 мүнүүтэ күүттүм быһыылаах, маастарым суоҕун курдук суох. Өтөр соҕус “һуу-һаа”, күө-дьаа буолан киирэн кэллэ. Биир да такси ылбатах, ол иһин өр буолбут.

Маастарым таҥаһын уларытан, илиитин суунан киирдэ. Бастаан уонча мүнүүтэ саҥата суох имэрийдэ. Мин эмиэ ньимийэн сыттым. Ол туран эмискэ иһиллэр баҕайытык өрө тыынан соһутта: «Что-то сердце не на месте!» – диэтэ. “Бай!” – диэн саҥа аллайан, биир кэм өгдөҥнүү түстүм. Онуоха түүнү быһа оҕото ыалдьан кыраадыстаан аанньа утуйбатахтарын, сарсыарданы быһа быраас ыҥыра сатаабытын, бу сеансы атын маастарга сыҥалаабытын, ону ким да сөбүлэспэтэҕин, оҕотун дьиэтигэр соҕотох хаалларан кэлбитин, бу онтон долгуйа турарын кэпсээтэ. Мин бастан аһынным, бэл, хайдах эрэ буруйдаах курдук сананным. Субу-субу: “Оо!” – диибин. Устунан Саха сирин килиимэтин сөбүлээбэтэхтэрин, субу-субу ыалдьалларын, дойдуларын (Башкортостан диэбитэ) ахталларын, кэргэнэ манна үлэ булбутун иһин көһөн кэлэргэ күһэллибиттэрин, бу куорат кииниттэн олус ыраах оройуоҥҥа кыбартыыра куортамнаан олороллорун, харчы туохха да тиийбэтин сэһэргээн барда. Ити өссө сороҕун эрэ өйдөөн хаалбыппын. Уопсайынан, туох баар кыһалҕатын миэхэ тоҕо “сүөкээн” кэбистэ. Билигин санаатахха, арааһа, үллэстэр да киһитэ суох, соҕотох сэҥээрээччи мин көстүбүппүн  быһыылаах.

Аны ыксыыра илиитин нөҥүө биллэр – харса суох күүскэ туппахтыыр, көхсүм котоку субу-субу аһыйар, ол эрээри “айа” диэн тыл айахпыттан тахсыбат. Бэйэм даҕаны ыалдьыбыт оҕолоох киһиэхэ айгыста сытыам дуо? 

Чэ, оннук биир чаас ааһа оҕуста. Бүттүбүт. Махтанным. Оҕото түргэнник үтүөрэригэр баҕара хааллым. Мин хаһан сэттэ ыстааммын ырытан кэтиэхпэр диэри маастарым тахсан барбыт этэ.

Сарсыныгар, доҕоор, сарсыарда этим бүтүннүү күөх баламах, тыҥырах суола буолан турбатым дуо! Ол иһин даҕаны олус күүскэ туппута ээ, ыарыым наһаа бэргээбит буолан итинник быһыылаах дии санаабытым. Тыҥыраҕа уһунун, маникюра кыраһыабайын, дьиҥэ, өйдөөн көрбүтүм да, туох диэхпиний.

Дьэ, ити сырыы кэнниттэн этим көҕөрбүтэ өтөрүнэн ааспакка эрэйдээбитэ, тыҥырах суола даҕаны балачча уһуннук сылдьыбыта. Онтон ыла массажка тиийдэхпинэ хараҕым тута маастардар тыҥырахтарыгар хатанар. Эрэй диэтэҕиҥ!

Маны биир эмэ маастар ааҕар буоллаххына, бука баһаалыста, тыҥыраххын уһатыма диэн көрдөһүүлээхпин. Баҕар, көстүүтэ кыраһыабайа буолуо, оттон килийиэҥҥэ айаката бэрт этэ.   

Крымҥа сатамматах сынньалаҥ

Тиийбит күнүм сарсыныгар үгэспинэн массажист ыйыталастым. Хата, гостиницабытыгар күн аайы биир дьахтар кэлэрин истэн, үөрүүм муҥура суох буолла. “Спорт инструктора үөрэхтээх, онон улахан уопуттаах”, – диэн уу иһэ-иһэ хайҕаатылар. Ону истэ-истэ били 13 чаас айаннаабыт сылаам ааспыкка дылы буолла. 

Сарсыныгар массажтыыр хоһугар тиийдим. Чахчы, уһун дьылыгыр уҥуохтаах, спортивнай көрүҥнээх маастар эбит. Кушеткаҕа сытааппын кытта, хантан сылдьарбын ыйыталаспытынан барда.  Саха сириттэн кэлбиппин истээт, тута баайбыт-дуолбут, алмааспыт ахтылынна, устунан хамнаспытын ыйыталаһан барда. Чэ, бастаан утаа тук курдук хоруйдуу, кэпсии-ипсии сыттым. Киһим устунан кинилэр хамнастара кыратын, кыамматтарын, ол иһин кыһалҕаттан эбии үлэҕэ сылдьалларын муҥатыйан барда. Тохтоло суох кэпсиир, ол быыһыгар ыйыталаһарын  да умнубат, ол аайы хамсанара улам эрчимирэн иһэр. Илиитэ, чахчы, үчүгэй, үөрэхтээҕэ тута биллэр, ол эрээри баһын иһэ барыта саҥа, төбөм саллаччы иһэн хаалла. Устунан ыаллаһан хаалла дуу, тус олохпун токкоолоһон барда. Хас саастаахпын, хас оҕолоохпун сураста.  Онтон олох даҕаны: «Эриҥ тоҕо кэлсибэтэ, бачча «аппетитнай» дьахтары тоҕо бэйэҕин эрэ ыытта, күнүүлээбэт дуо?» – диэн, олох да саҥабыттан матарда...

Ити курдук, биир чаас сынньанаары, үлтү сылайан таҕыстым. Эбиитин сарсыныгар дэлби көһүйэн турдум уонна кэбис, сылдьан бүтүүһүбүн дии санаан, бассаабынан тиийбэппин диэн сэрэттим уонна кини хоһун ырааҕынан тумна сырыттым.

Манан массажистарга тугу туһаайан этиэхпин баҕарабыный? Килийиэн эһиэхэ сынньана, сылаатын кыйдыы, туругун тупсара тиийэр. Кэпсэтэр, сэлэһэр, аан дойдуну ырытар, ыаһахтаһар наадата суох. Туора киһи тус олоҕун токкоолоһор этикет да быһыытынан соччото суох.